PAABUTON pa ang resolusyon gikan sa Regional Inter-Agency Task Force (RIATF) alang sa ipatumang uniform border control sulod sa Davao Region.
Kini ang gibutyag ni Davao City Mayor Sara Duterte-Carpio atol Special Hour Program niini sa Davao City Disaster Radio, kagahapon sa hapon.
Una niini, naguol ang mga tawo basin unya dili na sila kasulod sa Davao City, rason nga gipasabot sa mayor unsay naglangkob nga mga local and Provincial Government unit sa Davao Region.
Ang Davao Region gilangkuban sa Davao City, Davao de Oro, Davao Occidental, Davao del Norte, Davao Oriental ug and Davao de Oro.
"Ginahulat nato ang resolution from the RIATF-11 para sa uniform border control," tipik sa giingon ni Duterte-Carpio.
Klaro ug dayag nga wala pa gipatuman sanglit wala pa migula ang resulosyon, luyo sa gibutyag sa Department of the Interior and Local Government (DILG)-Davao nga giaprobahan na ang sugyot.
Giklaro sab sa mayor nga ang matag utlanan kun border sa Davao Region hugot nga mopatuman sa pagsulod sa mga tawo nga gikan sa silingan rehiyon niini nga mao ang Northern Mindanao sa Bukidnon area, Soccsksargen sa North Cotabato ug ang Davao de Oro sa Caraga Region.
Giingon sab ni Mayor Sara nga di pa kinahanglan ang negative RT-PCR test result sa kinsa mang buot mosud sa Davao Region.
"We will wait sa kung unsa ang ipa-implement ug ang guide nga ipagawas sa RIATF and RTF," sumpay sa mayor.
Giklaro sab nga wala pa'y opisyal nga mga sumbanan nga gipagawas. Base sa pinakaulahing pahayag gikan sa DILG-Davao, ang mga sumbanan gihingpit pa ug gilauman nga mapagawas kini karong semanaha (Mayo 3-9, 2021).
Tungod niini wala pa'y pagsira sa rehiyon o siyudad nga mga utlanan. Apan duna nay pag-istrikto nga pagkontrol sa mga borders. (Jeepy P. Compio)