Pagkalaw-ay sa balita nga nisugat dihang akong giablihan akong Google news kay atong masabot nga nigara ang mga Insek.
Ang Department of Foreign Affairs niprotesta kay ang Chinese Coast Guard nagsunodsunod, mobabag, mohimog makuyaw nga mga lakang, ug manghagit diha sa radio ngadto sa barko sa Philippine Coast Guard.
Ang DFA niprotesta na sab sa pagpundok sa mga barkong pangisda ug militia sa mga Insek dinhi mismo sa mga dapit nga gipanag-iya sa Pilipinas.
Nagkanayon ang DFA nga ang pagpundok sa mga barkong Insek diha sa Pag-asa islands ug Bajo de Masinloc makapabalaka. Matod pa, kini kay paglapas sa soberenya sa Pilipinas.
Maayo kaayo, alang kanako, nga nibarog ug nilihok ang DFA ug ang Philippine Coast Guard pabor sa Pilipinas.
Makasubo lang kay daw lahi ang gipamahayag karong bag-o sa Malakanyang. Mas uyon pa ang Malakanyang nga wala kitay buhaton kay nahadlok kini nga gubaton kita sa China.
Kining baruganan sa Malakanyang, sa akong simpleng pangagpas, mao pa hinungdan nga daw nigara karon ang mga barko ug Coast Guard sa China.
Ang nakabati og samot kay ang diehard supporters ni Presidente Duterte diha sa Facebook ug ubang social media channels kay sa ilang pagdepensa sa pagka talawan sa baruganan sa presidente, hagiton pa kita nga maoy mounag dasdas ngadto sa West Philippine Sea.
WPS UG ELEKSYON
Atong masabot karong nga ang umaabot nga piliay sama sa referendum usab sa atong baruganan kabahin sa West Philippine Sea.
Ang mga Duterte klarong pabor nga ipadayon ang daw special nga relasyon sa Pilipinas sa China. Apan dakong bahin sa oposisyon wala makauyon sa baruganan karon sa Malakanyang kabahin sa West Philippine Sea. Mao kadtong nitumaw nga coalition nga gitawag nga 1Sambayan.
Apan atong nabantayan sa pag-convene sa 1Sambayan nga walay labot si Senador Manny Pacquaio. Usa sa akong pangagpas niadtong tungora tungod sa kawalay impormasyon kon unsay baruganan ni Pacman kabahin sa West Philippine Sea.
Apan karong semanaha, atong nasayran nga wala makaapil si Pacman sa pirmahay sa usa ka Senate resolution kabahin sa West Philippine Sea. Apan nagpadala siya og sulat ngadto sa embahada sa China kabahin sa pagpundok sa mga barkong China sa dapit.
Supak diay si Pacman. Wa sab siya mosunod sa tinalawan nga baruganan ni Presidente Duterte. (DM @anol_cebu)