KANIADTO sa wala pa modagsa ang Covid-19 sa 2020 sa atong nasud, ann naghatag og sakit sa ulo sa mga motorista ug mobiyahe padung sa amihanan sa Sugbo mao ang grabe nga trapiko sa Dakbayan sa Mandaue ug Lungsod sa Consolacion. Sa miaging tuig tungod sa kwarentinas, niluag ang kadalanan ug milambo ang mga halaman kay naminos ang itom nga aso gikan sa mga sakyanan.
Ang Consolacion niadtong Nobiyembre 2020 nagdili na sa mga sakyanan nga moliko sa wala sa mga interseksyon sa highway, labina na sa atubangan sa usa ka dako nga mall. Gibutangan usab og mga babag ang tunga sa highway, nga di na makatabok bisan asa ang mga motorsiklo ug mga tawo.
Gidili na usab ang pagparada sa mga sakyanan sa kilid sa highway. Gani, duna nay towing truck ang Consolacion nga magbahas-bahas sa highway ug moguroy sa mga sakyanan nga iparada sa kilid sa highway.
Karon nga ang Sugbo naa sa estado sa modified general community quarantine (MGCQ) tungod kay napugngan man ang pagkuyanap sa Covid-19, mibalik na usab ang grabe nga trapiko dinhi sa Sugbo labina sa mga dakbayan. Apan ang Consolacion, tungod sa gipatuman nga mga lagda. di na sama kaniadto kabarado ang trapiko.
Karon, miirog na ang grabe nga trapiko sa lungsod sa Liloan hangtod sa Compostela, nga ang highway mitadlas sa tunga lungsod ug way lain dalan nga maagian aron maminosan ang grabe nga trapiko.
Sa Liloan, ang hinungdan sa hataas nga linya sa mga sakyanan padulong sa amihanan mao ang eskina atubangan sa simbahan tungod kay mag-abot ang mga sakyanan nga naggikan sa Barangay Catarman ug moliko sa wala padulong sa highway ingon man ang mga sakyanan nga gikan sa amihanan ug mopadulong sa Catarman o molahos sa Mandaue. Ang interseksyon atubangan sa simbahan morag letrang Y ug T hinungdan sa gubot pas’ lukot sa dagan sa trapiko labina kon way traffic enforcer nga modirihir.
Maayo unta og nakahibawo na si Liloan Mayor Cristian Garcia-Frasco ug iyang bana, si Kong. Duke Frasco, aron mahatagan og solusyon ning maong problema. Ang mga sakyanan nga moparada kilid sa highway diha sa sentro sa lungsod nakadugang usab sa problema sa trapiko ug ang mga tawo nga motabok sa dalan bisan asa.
Sa lungsod sa Compostela, ang grabe nga trapiko mao ang dapit sa highway nga giatbangan sa balay-lungsod ug merkado tungod kay daghang mga sakyanan ug tricycle nga mohunong ingon man ang mga sakyanan nga moliko padung sa munisipyo. Ang mga tindahan sa kilid sa highway nakadugang usab sa problema sa trapiko kay ang mamalit nga magsakay anha ra mourong sa kilid sa highway.
Maayo unta kon ang Highway Patrol Group (HPG)mopatrolya sa highway ug manakop sa mga sakyanan nga anha ra moparada sa kilid nga gidili sa atong balaod.