WALA gyuy ik o nangugat si Lapu-Lapu City Mayor Junard “Ahong” Chan kabahin sa pangangkon ni Senador Bong Go nga si Datu Lapulapu, unang lumad nga mibuntog sa mga langyaw, taga Mindanao ug kaliwat og Tausog, usa ka tribo sa Muslim. Dili diay taga Mactan si Lapulapu sukwahi sa nasulat sa kasaysayan. Taga Mindanao siya nga gipadala sa Sultanate of Sulu aron abugon ang mga langiyaw nga midagsa sa isla sa Mactan. Giluwatan ni Go ang maong kausaban sa kasaysayan atol sa ika-500 ka tuig nga kasumaran sa kadaugan sa Mactan niadtong Abril 27, 2021.
Dakong insulto ug tamparus alang sa taga Mactan ang pagtuis ni Sen. Go sa kasaysayan. Hinuon, iya usab kining gibase sa panuki-duki ni Abraham Idjirani, usa ka Muslim historian ug tigpamaba sa Sultanate of Sulu. Nahimong kataw-anan ang pamahayag ni Go labi pa sa historians gumikan kay dako mang sukwahi sa atong nakat-unan sa atong kasaysayan ug history textbooks ug classes.
Sa miaging tuig, sa dihang migawas ang rap song sa Fil-Am rapper, EZ Mil, nga nag-ulohan og “Panalo” nga adunay lyrics nga “si Lapulapu pinugutan ng ulo,” puwerting kisi-kisi ni Mayor Chan. Iyang giawhag ang konseho nga mopasar og resolusyon nga mag-deklarar nga “persona non grata” (dili welcome) si EZ Mil ug nidemanda nga mangayo og pasaylo sa mga Oponganon. Nangayo pod hinuon og pasaylo si EZ Mil.
Apan ning pagtuis sa kasaysayan ni Sen. Go, morag hilum man si Chan. Nitingog tuod apan igo ra niingon nga katungod pod kana sa senador. Wala man moulbo iyang kaspa sama sa pag-ulbo sa gihimo ni EZ Mil. Sa mga sugarol pa, mora man og nikakak si Mayor Chan. Ngano kaha? Hadlok siyang makigbangga o mosungag ni Senador Go? Dili niya depensahan si Datu Lapulapu ug iyang dakbayan ning panamastamas?
Hinuon, nangayo na og dispensa si Sen. Go human siya kusganong gisaway sa historians ug netizens sa social media. Kon wala pa siya sawaya, iya kaha usab nga himuon ang pagpangayo og dispensa ug mibasol sa iyang speech writer? Siyaro naman usab nga wala niya gi-review ang sinuwat sa iyang speech writer sa wala pa niya basaha. Unya, mao nay mag-presidente? Pastilan.