SUPERBALITA CEBU

Editoryal: Gidali-dali

Editorial Cartoon by John Gilbert Manantan

DAGHAN ang nangreklamong mga motorista sa social media tungod sa kalapdon sa bahin sa karsada nga gipamutangan og bike lanes. Gamay pa ang gilapdon sa mga karsada, gibutangan pa og bike lanes, matod sa mga motorista.

Sa Dakbayan sa Sugbo, ang ordinansa sa Siyudad klaro nga naglatid nga 1.5 metros ang gilapdon sa bike lanes nga ipamutang, apan ang Department of Public Works and Highways (DPWH) namutang og 2.5 metros nga gilapdon sa bike lanes sa ubang mga dapit sa nasod.

Busa, gihangyo sa Sugbo Bike Lanes Board ang DPWH nga di sab paabton og 2.5 metros ang gilapdon sa bike lanes. Nisanong ang DPWH, apan medyo lapad lang gihapon ang lanes sa hagip-ot nga mga karsada sa siyudad.

Maayo unta kon ang kagamhanan naghimo og pagtuon sa tanang mga dapit nga ilang gibutangan og bike lanes. Di man gud haom nga butangan og bike lane nga lapad ang tanang mga karsada. Huot na gani daan ang trapiko, gibutangan pa og bike lane nga lapad. Mas maayo unta kon ang lane gipahaum usab sa gilapdon sa karsada.

Kasagaran ra ba sa karsada sa Siyudad sa Sugbo hagip-ot. Duna man tuoy medyo lapad, apan kuwang lang gihapon kon volume sa mga sakyanan ang hisgutan.

Di ba mas maayo nga dunay mga pagtuon nga gipahigayon, di kay dali-dalion ang pagbutang aron lang ingnon nga duna nay proyektong nahimo. Di lang kay bike lanes ang mahimo unta. Kuwang ni kon way support facilities nga ibutang, sama sa pag-aghat sa mga pribadong kompaniya sa pagbutang og wash area alang sa magbiseklita, bike parking sa mga building diin luwas kining mabilin ug bike repair station sa strategic nga mga lugar.

Gikinahanglan pa usab nga edukahon ang publiko kalabot sa importansya sa bike lanes, ordinansa, ka importante sa pagsul-ob sa hustong sapot ug traffic laws. Karon makaguol huna-hunaon kay gidali ang pagpamadlis sa kadalanan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!