Kagawad sa usa ka barangay sa Palo, Leyte nasikop sa mga awtoridad sa anti-illegal drug operation.
Giila sa kapulisan ang suspek nga si Arnel Fundevilla, 48, biyudo, kagawad sa Barangay Cavite East, Palo.
Si Fundevilla naa sa listahan isip high value individual (HVI) gumikan sa iyang kalambigitan sa illegal drugs bisan sa iyang gihuptan nga katungdanan sa gobiyerno.
Base sa report sa kapulisan, taudtaud na sila nakadawat og report bahin sa illegal nga kalihukan ni Fundevilla busa ila kining gipaubos sa surveillance.
Alas 6:45 sa gabii, Huwebes, Abril 29, 2021, gilunsad sa hiniusang pwersa sa Leyte Provincial Drug Enforcement Unit (LPDEU) pinangulohan ni Police Major Dennis Gatela ug Palo Police Station pinangulohan ni Police Major Aldo Mendola ang usa ka drug bust.
Gipahigayon ang operasyon sa Barangay Naga Naga.
Usa ka poseur buyer nakigtransaksyon kang Fundevilla ug gipalitan siya og usa ka pakete sa gituhoang shabu balor og P500.
Sa dihang nahuman ang transaksyon, nisinyas na ang pulis nga positibo ilang tuyo hinungdan nga gideklara ang pagsikop kang Fundevilla ug gipahibawo sa tanan niyang katungod.
Atubangan sa mga saksi, gikapkapan si Fundevilla ug nakuhaan og laing lima ka pakete sa gituhoang shabu.
Gikustodiya siya sa Palo Police Station ug gipasakaan og kasong kalapasan sa Republic Act 9165 kun Comprehensive Dangerous Drugs Act of 2002. (JKDP)