SUPERBALITA CEBU

Anak sa konsehal sa Mabolo nasikop sa buy-bust SA PDEA

Anak sa konsehal sa Barangay Mabolo sa Siyudad sa Sugbo nadakpan sa mga sakop sa Philippine Drug Enforcement Agency 7 (PDEA) 7 atol sa ilang buy-bust niadtong Abril 30, 2021 alas 8 sa gabii.

Ang target sa operasyon mao ang usa ka drug den sa S. Borces Street, Barangay Mabolo nga niresulta sa pagkasikop ni John Paolo Ompoc, anak ni barangay konsehal Rey Ompoc.

Si Ompoc maoy nangunay sa pagsaksi sa imbentaryo sa mga drugas nga nakuha atol sa operasyon.

Si John Paolo, 25, target sa operasyon isip drug den maintainer, matod sa PDEA 7.

Nasikop usab sila si Erick John Cristoria, 24; Reyjuldino Cristoria, 32; Francis Sanico, 29; ug Marksell Cristoria 32.

Nakuha gikan kanila ang 49 ka pakete sa gituohang shabu nga motimbang og 12 gramos nga mobalor og P81,600 ug buy-bust money, lakip na ang mga gamit sa pagsuyop.

Matod ni Leia Alcantara, information officer sa PDEA 7, nga bisan nalambigit ang anak, si konsehal Rey ang nipirma sa inventory nga nagpasabot nga wa siya mopatunga sa gihimo sa PDEA.

Si Ompoc kanhi barangay kapitan sa Mabolo sa daghang katuigan.

Sa samang adlaw, alas 11:30 sa gabii, laing buy-bust gihimo sa PDEA 7 sa usa ka drug den sa Purok Nangka, Sityo Telecom, Barangay Casuntingan, Siyudad sa Mandaue nga niresulta usab sa pagkasikop sa usa ka high value individual.

Ang nadakpan giila nga si Lizardo A. Togono, 44, on-call plumber, kinsa nagpadagan usab og suyopanan sa sulod sa iyang balay apan dali nga nakaambak ang mga tawo nga nanuyop sa ikaduhang andana niini.

Nakuha sa mga operatiba ang 20 ka pakete sa gituohang shabu nga motimbang oga 20 gramos nga mobalor ang tanan sa P40,000.

Gikan ang impormasyon sa usa ka informant ug gipaubos dayon sa PDEA 7 sa tulo ka buwan nga surveillance.

Nasuta nga tinuod ang gibutyag sa ilang informant.

NASIKOP

Sa Siyudad sa Toledo, Cebu, manag-uyab nasikop sa buy-bust, nakuhaan og binultong drugas niadtong Mayo 2, 2021 sa alas 10:20 sa gabii sa Sitio Kinner, Barangay Ibo.

Si Thomy Patambag Salvador, 26, construction worker, residente sa Ibo, ug si Jennilyn Yntig Mambaje, 29, taga Sitio Tubod, Barangay Pondol, Lungsod sa Balamban, maoy gi-buy-bust.

Si Police Lt. Col. Junnel Caadlawon, hepe sa Toledo Police Station, ang nangulo sa buy-bust.

Sumala pa niini nga Si Salvador nalakip sa ilang listahan nga nalambigit sa pagpamaligya og illegal drugs.

Nakuha gikan ni Salvador ang 23 ka gamayng putos sa shabu, tulo ka medium sized nga shabu, P1,250 cash ug P300 buy-bust money, samtang Si Mambaje nakuhaan og upat ka gamayng putos sa shabu ug paraphernalia.

Ang drugas nitimbang og 12 gramos nga mobalor sa P81,600 base sa Dangerous Drugs Board (DDB) value. (Dugang taho ni GPL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph