SUPERBALITA CEBU

Gwen padayong mopatuman sa iyang EO 17

AYAW MIG HILABTI: Mao kini ang sulti ni Gobernador Gwendolyn Garcia sa iyang pagpatuman sa iyang Exe­cutive Order (EO) 17 alang sa mga overseas Filipino worker ug returning overseas Filipinos. Matod ni Garcia nga gawas nga makaayo kini sa kagamhanan kay mominos ang gasto ug makahatag og taas nga panahon sa mga Sugboanon manguli gikan sa abroad, nagpakita usab nga kini wa maakpekto sa mga kaso sa coronavirus disease. / ALEX BADAYOS

PAHIMOAN ni Gobernador Gwendolyn Garcia sa Provincial Board og ordinansa ang iyang Executive Order (EO) 17 nga nagpaluag sa mga rekisitos sa overseas Filipino worker (OFW) ug returning overseas Filipinos (ROF).

Si Garcia namahayag niini human ang ulohang buhatan sa Department of Health (DOH) giingong gusto nga mopasunod sa Sugbo sa protocol niini sa mga OFW ug ROF nga manguli sa lalawigan.

Ang EO nagpaluag sa entry protocol sa mga repatriated OFW ug ROF.

Atol sa press conference ni Garcia sa Mayo 3 ,2021 sa San Francisco, Camotes Islands, ang gobernador niingon nga ipadayon niya og patuman ang EO 17 base sa nalatid sa Section 5 sa Local Government Code.

Ang probisyon sa balaud naghatag og gahom sa LGU sa pagdumala sa iyang lokalidad atol sa emerhensya.

“I shall invoke and I am invoking Section 105. This is not to say that we will not listen to your recommendations but any imposition will have to be with the concurrence of the province of Cebu,” matod ni Garcia.

Ang NIATF nagmando sa tanang LGUs nga ang mga repatriated OFWs ug ang ROFs kinahanglan ikwarantina og lima ka adlaw una pa ipa-swab test sa ikaunom nga adlaw.

Apan sa EO 17 ni Garcia nga gipatuman niadtong Marso 31, 2021, i-swab test dayon ang mga OFW ug ROF kon sila moabot sa Sugbo agi sa Mactan Cebu International Airport (MCIA).

Human sa swab test, dad-on sila sa hotel diin sila naka-book nga mopuyo samtang maghuwat sa resulta.

Kon negatibo, makauli dayon ang OFW ug ROF.

Apan kon positibo sa Sars-CoV-2, dad-on siya og isolation facility.

Tumong ni Garcia nga di mabug-atan og ang OFW ug ROF nga nibakasyon ug dunay igong panahon sa pakig-uban sa pamilya.

Mas mogamay usab ang galastuhan sa kagamhanan.

Sa datos sa Oveseas Workers Welfare Administration (Owwa) nga gipresentar ni Garcia, matag flight adunay 220 ka mga pasahero nga moabot sa Sugbo ug matag adlaw adunay tulo ka flight.

Sa 220 ka mga pasahero, makagasto ang Owwa og P924,000 alang sa tulo ka adlaw nga hotel accommodation, kon magsunod sa EO 17 ni Garcia.

Apan kon sundon ang unom ka adlaw nga kwarantina, makagasto ang Owwa og P2.264 milyones alang sa hotel accommodation.

Kon tan-awon kini matag pasahero, sigon ni Garcia nga sa tulo ka adlaw nga kwarantina, makagasto lang ang Owwa og P4,200 samtang sa unom ka adlaw, mokabat kini og P11,200 kun pil-on og hapit upat ka higayon ang galastuhan.

AYAW HILABTI

Matod ni Garcia nga pinaagi usab sa iyang EO, di malangay ang mga OFW ug ROF sa pagpakig-uban sa ilang pamilya.

Kon tumanon ang nasudnong protocol, makuhaan ang mga adlaw sa ilang pagbakasyon, dugang sa governador.

Bisan pa sa paglupalag sa pagsulod sa mga OFWs ug ROFs sa Cebu Province, sigon ni Garcia nga padayon gihapon ang pag-ubos sa mga kaso sa lugar.

Gitala sa DOH 7 niadtong Marso 31, nga aduna lay 1,451 ka aktibong kaso sa probinsya sa Sugbo.

Samtang ang aktibong kaso niadtong Mayo 2, 2021, nakatala ang DOH 7 og 889.

Niingon si Garcia nga nagpasabot kini nga nakontrolar ra sa Sugbo ang pagkuyanap sa kaso sa Covid-19 niini.

Matod ni Garcia ang ilang desisyon bunga sa ilang pagkonsulta sa mga ahensya.

“Ayaw ko og hilabti kay dili ko motingog. I don’t need to insist on Section 105. Ayaw lang mi hilabti diri,” sigon ni Garcia ngadto sa tulo ka mga consultant sa DOH Central Office.

Giasoy ni Garcia nga ang tulo ka consultants mao sab ang nirekomendar nga ipaubos sa lockdown ang Sugbo tungod sa nagkataas nga mga kaso niini niadtong mga unang buwan sa tuig

Matod sab niya nga usa sa consultant nipangan sa P.3 (Philippine variant) ngadto sa CV.3 (Central Visayas variant).

Sigon ni Dr. Mary Jean Loreche, DOH 7 spokesperson, nga wala pa silay nadawat nga feedback gikan sa kaulohan human pag-apilar kabahin niini apan nakita nila nga P.3 na ang gigamit nila nga termino.

“For us to be accused of exporting the P.3, I believe that is uncalled for. We can do our protocols because we have proven it to be right for us,” sigon Loreche.

Misuporta sab si Loreche sa lakang ni Garcia nga ipadayon og implementar ang EO 17.

Bisan paman, padayon sab sa pagpanghingusog si Loreche nga tanang minimum health standards matuman sa katawhan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph