Nagta-op pa ang kutsilyo diha sa buko-buko sa 25 anyos nga dalaga nga nalandig sa tambalanan sa Dakbayan sa Toledo human ni dunggaba sa iyang kanhi hinigugma.
Nahitabo kini sa Magsaysay Hills, Barangay Poblacion, Siyudad sa Toledo sa 6:30 sa gabii niadtong Mayo 3, 2021.
Ang babaye giila nga si Jessierae Maceda Wabe, 25, nga adunay live-in partner nga nagpuyo ra usab sa dapit.
Gitumbok nga suspek ang kanhi uyab ni Wabe nga iya ra sab nga silingan nga si Jaypee Golez Pajaron, 33, minyo.
Sigun sa imbestigasyon sa Toledo City Police Station pinaagi ni Police Lieutenant Colonel Junnel Caadlawon nga samtang nagpalit og pagkaon sa tindahan si Wabe, nibutho si Pajaron dayon dunggab ni Wabe sa buko-buko gamit ang kutsilyo.
Nisuway pa unta si Wabe sa pag-ilog sa dala niini nga kutsilyo apan padayon si Pajaron nga nanunggab.
Ang katapusang hansak wa na maibot ug mitaop sa buko-buko ni Wabe.
Human sa hitabo nisibat si Pajaron samtang si Wabe gidala gilayon kini sa Toledo City General Hospital.
Base sa imbestigasyon sa pulis, nasuko si Pajaron nga gibuwagan ni Wabe.
Matod ni Caadlawon nga dali nila nadakpan si Pajaron tungod sa Global Positioning System (GPS) sa police station. Ila dayon nga na tultolan ang balay ni Pajaron.
Gikatahong selos maoy nagtukmod ni Pajaron sa pagdunggab niya ni Wabe sa dihang iyang nasayran nga aduna na kini laing gikaipon. (AYB)