PAMPANGA

Garcia: Bulan ding Bulaklak at Santakrusan (Month of Flowers and Santacruzan)

Kapisik

“INDAT bulan ning Mayu/ampang king Santa K’rus;

Laganas a baranggay/anting itik a mibulus.

Pangalwal na ning limbun/ding taung tipun-tipun;

Durutan de’ing baranggay/asno dakal ding tatagun.

Makapaterak! Makapakayli! Makapagal ing Batalya...

Tutulu pawas/ing daya titas/meyari na bisa ka pa!

Dalaga’t baintau/manintun ayasawa;

Mamandurut la buntuk/kabang mag-Batalya la.

Kalwal da ring sagala,/emperatris at reyna;

Mangakaba la batal/mangabural la mata...

Makapakending! Makapakembut!/Pati matun mangalembut...

Milalakad la reng pile/mitutulid la reng bukut.

Mitwag keng limang babi at miyasawang damulag;

Atlumpulu lang manuk,/ema’t asan bang iyapag.

Dakal man ing tau yu/nung dakal no mang salangi;

Nung mangatako la ngan/anapnap da pati bangi!

Makapanyuka! Makapanilak!/Ugali da ring aliwa...

Agisan da na ing tau yu/E la pa mu rin sasawa!

E mabaldug ing karayum, karing taung pesitagun,

Mekad kapupus ning batalya...Pati baug mabuktut na!

Ing maling kapanwalan/mayayakit king kapyestan;

Pabanwang titipunan/metung aldo magisan ngan.

Dakal lang ka-baranggay makatula la rugu.

‘Bisna manutang la mu, atin la sanang pagtau.

Makapagmulala!/Makapangasdan!/Panugali ta’ng amana...

Dakal kaniti masagwa/alakwan da ring Kastila!

Meyari na bisa ka pa!/Meyari na bisa ka pa!

-- BATALYA, Lawiwing meyangu king Senayang Tigtigan

king Lumang Makabebe /Amanu - ImpunSigwa 11.19.2003

***

Mailig lang magsaya ring Kapampangan. Likas karela iti kanita pang minunang panaun.

Agnan ning pamamukadkad da ring mangabanglu, mangalagu at matimyas a bulaklak ya pin ing malambat nang akasanayang gawi tamu anting Katolikung Kapampangan ing pamag-santakrusan. Kanita atin pang amanwan dang “Doce Pares” nung nu deng gaganap asno kabyasa king pamanarti at pamanagkas karing pakatutuk a kimut at amanu ning kwentu da ring labingadwang talapanglwalung magelingan king eskrima ning nwan a relikya ning Nwan a Kurus a atagmwan ning Reyna Elena kaybat ning pamagdulap kaniti king mabilug a Yerusalem.

King gatpanapun ning kapyestan atin lang miyayaliwang papyalung a gaganapan da king baranggay at madalas king arapan ning bisitas iti. Palo sebu, siglulung langgotsi, tusuk singsing, kisaban kawali, sungab arina, dakapan bigak o dakapan bibi o manuk, sulutan karayum at siglulung pulandit o siglulung bisikleta o mekad siglulung damulag.

Ing santakrusan kayabe ne’t agnan mipapagmasusyan ning pyesta ning baranggay o balen nung nu magaganap iti king kabengyan ning kapagmasusyan. Misan tula da mu reng memalen ing pamag-santakrusan. Bisa lang magsaya. Gagayak da la ring memaranggay ding mangalagung kababaynan, anak man o dalaga na–at pati na deng mangatwa at binabai misan–at deti atin lang awsan dang arkung darala da reng misusumangid a anak a mamwat kaniti magmula anggang mapupus ing santakrusan. Ditak mu ing sangkan niti ing kasalpantayanan.

Karing baranggay o kabalenan da la lilimbun ding pakagayak a mangalagung kababaynan kambe ring kasangga ra at pati na gaganap obispu, prinsipi at prinsesa, ari at reyna at pati na ing awsan dang “manyingle batu” a king gulut ning limbun single-single batu keng maragul a kawa. King katatawlyan ning limbun karin ya ing patulunan ning baranggay o balen. Ing pamagtau singkarakal at singkanyaman miyayaliwang ulam, pakawasa, pagmayumu at pati na ing e na sana kayabe pamaglasing.

Ing metung a e pa malyaring gawan ngeni ya pin ing limbun at kayari niti ing Batalya nung nu ing patulunan piterak-terak de karu at deng taung pesitagun terak-terak la mu naman. Agnan ning tigtigan ding mosikus a manigtigan king lawiwi ning Batalya buri dang paulit-ulit titigtig at titerak anggang sumawa na la ding mosikus agyang deng tau e la pa bisang patugut. Gugulisak lang “Misan pa! Misan pa!” inya panusignan da la reng banda.

Neng ing bulan ning Mayu karin la dakal mu naman a mamukadkad a bulaklak subali pa karing bungang tanaman, mararapat ing kapagmasusyan ning “May Flower Festival” mabilug a pabulan balang gatpanapun mag-ampang lang bulaklak ding keraklan kababaynan a kayagum king Solidarity of Mary–o ding “sodalis” awsan da–king Indung Marya. Kaniti magdalit lang mangalagu at mangayumung lawiwi ding midaraun bulaklak king arapan ning larawan nang Indung Marya kilub ning pisamban o bisitas. Padurutnan de’t palibutnan ing larawan kabang magdalit la’t manampang karing darala dang bulaklak a mangabanglu.

Deti ring paniglon ta ngening Kapampangan neng dintang ing sakit a makayawa at bawal ing maglupung-lupung at misulu-sulu inya panamdaman ta’ng bina ing e ta agawa iti king kasalungsungan.

***

Dake Talabaldugan

mipanapal (pangdiwa) mipanakap, mipangampi king kamalyan, mipanusig, misapakat, mipanyapakat—maralas king e mayap. English - conspired, connived, collude, cabal, plot, put up, finagle, scheme. Alimbawa king pamangamit: “Deng mipanapal ila ring pareung atin sasalikut a kamulangan at pikabalwan da inya tatakut lang panyabyan da iti.”

mipanaplit (pangdiwa) mipamirapal, pisabi o pikasundwan dang agnan mambilis. English - hurried up simultaneously or at the same agreed upon time, rushing together with some prodding or nudging from one another. Alimbawa king pamangamit: “Neng matalik lang mikaluguran agnan lang mekipusitara at mipanaplit lang pakasal at mikayanak.”

***

Sadyang gawi da reng Kapampangan

Bengi-bengi sadya neng bulan ning Mayu pane na kanyan ing santakrusan kareng sibabaranggay at sibabalen. Misan pin keng metung a balen mu arin lima anggang apulu o migit pang magsantakrusan. Sumasumangid la reng magtau, migagayak sagala ampong maglimbun. Dakal lang migagayak a mangalagung dalaga, pati na dalaginding at ding kasangga da.

King kasalungsungan ala na pa ita. Balabalikiran ta na mu ing santakrusan kareng lumang posts kareng social media. Taganang e malyari ing maulit ngeni ing sadyang gawi dapot makanyan man–kayari ning sakit a makayawa–e ta sana kakalingwan ing gawing mangasanting antiti.

Santakrusan -- e sana makakalingwan ing gawing masayang ini.

***

Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph