COTABATO CITY -- Tulo ka tawo nga nagdala og daghang mga bala ang nadakpan sa mga sundalo alas 11:00 sa buntag, Lunes, Mayo 3, didto sa Shariff Saydona Mustapha, Maguindanao Province.
Nasayran gikan kang 6th Infantry (Kampilan) Division Chief ug Joint Task Force Central Commander Major/General Juvymax Uy nga nasiplatan sa mga sakop sa 33rd Infantry Battalion, Philippine Army ang tulo ka tawo nga kadudahon og lihok nga sakay sa kolor gray nga Honda Civic nga dunay plaka nga YDP-800 sa national highway sa checkpoint sa PNP/AFP sa nahisgutang lugar.
Sa diha nga giukay sa mga sundalo ang sulod sa kotse ug giukban ang dala nila nga kahon, nakita ang 6,000 rounds sa bala sa M16 Armalite rifle.
Sa diha nga gipangitaan og papeles ang mga suspek sa dala nila nga mga bala, wala silay ikapakita hinungdan nga gipangdakop.
Daghan ang nagtuo nga posibleng dalhon ang mga bala sa kampo sa Bangsamoro Islamic Freedom Fighters gumikan nagkahurot na ang ilang suplay gumikan sa katag-katag nga engkuwentro sa militar.
Nagdumili ang militar nga ibutyag ang bansagon sa mga suspek gumikan padayon pa ang ilang imbestigasyon. (Edgar E. Fuerzas)