MIUS-OS ang mga kaso sa dengue sa Davao Region karong tuiga sa kapin 50 porsiyento, sumala sa Department of Health (DOH)-Davao.
Base sa datus sa DOH gikan Enero hangtud Abril 30, 2021, ang tibuok rehiyon nitala lang og 469 ka mga kaso. Kini ubos og 51.8 porsiyento gikan sa 974 ka mga kaso nga natala niadtong 2020 sa samang panahon.
Ang Davao City, nga dunay pinakadaghan nga mga kaso gikan sa maong mga katuigan mitala og 23.61 porsiyento ubos sa mga kaso gikan 487 sa 2020 ngadto sa 372 sa 2021.
Samtang sa Davao del Norte, mitala sa pinakaubos nga porsiyento nga 90.7 gikan sa 151 ka kaso sa 2020 ngadto sa 14 na lang sa 2021.
Davao Oriental, ang nag-inusarang probinsiya nga duna lay single-digit nga kaso, mitala sab og 55.5 porsiyento nga pagkubos gikan sa siyam niadtong 2020 ngadto sa upat sa 2021.
Samtang ang Davao de Oro mitala og 23.61-porsiyento nga pagkubos gikan 157 ka kaso sa 2020 ngadto sa 37 sa 2021; Ang Davao del Sur uban sa 82.2 porsiyento nga pag-ubos nga 45 ka kaso niadtong 2020 ngadto sa otso na lang sa 2021; ug ang Davao Occidental nga 72.8 porsiyento nga pagkubos gikan sa 125 ka kaso sa 2020 ngadto sa 34 sa 2021.
Gikanayon ni DOH-Davao Dengue Program Manager Antonietta nga padayon ang ilang programa batok sa dengue pinaagi sa information campaigns ug tropical fogging, ilabi na sa mga barangay, bisan pa sa nagpadayon ang Covid-19 pandemic.
Matud sab niya nga mga restriksiyon nga giimposar sa atol sa quarantine nakatabang sa pagkubos sa ihap sa mga kaso sa dengue sa rehiyon. (Ralph Lawrence G. Llemit)