Mikakak gihapon matusokan

DAVAO. Makita sa hulagway nga mi-plastar kining usa ka babayeng frontline health worker nga midawat sa unang dose sa iyang Covid-19 vaccine sa nakalabay nga semana sa Davao City. (Rodel Natad/dxGM Super Radyo Davao)
DAVAO. Makita sa hulagway nga mi-plastar kining usa ka babayeng frontline health worker nga midawat sa unang dose sa iyang Covid-19 vaccine sa nakalabay nga semana sa Davao City. (Rodel Natad/dxGM Super Radyo Davao)

BISAN og nakita sa halos tanang Pilipino ang pagpabakuna batok Covid-19 ni Pangulong Rodrigo Duterte gamit ang Sinopharm, dili gihapon mosalig ang usa ka traysikad drayber sa bakuna.

"Dili ko, dili sila kabuot nako, basin diha na hinuon ta matiurok," ingon ni Eddie Villanueva, 52 anyos, sikad drayber sa Roxas Extension, Barangay 31-D, Davao City.

Alang sab kang Marisol Guino, 40 anyos, residente sa Barangay 76-A, Bucana, siyudad sa Davao, dili luwas ang bakuna labi na kung dunay tawo nga dili mohaum sa lawas ang iturok nga bakuna.

"Luwas siya sa kadaghanan, pero naa baya gyoy tawo nga di mouyon ang lawas basin isog or naa siya'y dakong risgo sa reaction sa vaccine, mao ray kamatyan, dili ang Covid," sulti ni Marisol.

Alang sab sa usa ka deboto sa usa ka sekta sa pagtuo, alang niya dili vaccine ang makaayo sa tawo, kon di mao ang pagtuo sa Labaw'ng Makagagahum.

"Walay imposible sa Diyos, siya ang nakahibalo kanus-a ta niya kuhaon, siya ang nasayod asa ug kang kinsa motakod ang virus. Ang pagkamaampuon ang mas labing gamhanan sa pagpakigbugno nato niining virus," sulti ni Rosalina Delfino-Gringo, 65 anyos, nga taga Barangay Malabog Proper nga nahinabi sa Superbalita pinaagi sa Messenger.

Dugang ni Rosalina nga dili gyud siya magpabakuna luyo sa impormasyon nga mosunod na ang mga senior citizens tungod bag-ohay lamang nahuman ang mga health workers.

Apan ang reaksiyon sa pipila nga dili magpabakuna, kabaliktaran sab kini kang Susan Relampagos, 62 anyos nga taga Barangay Vicente Duterte, Davao City, kay eksayted na siya nga mabakunahan.

"Excited kaayo ko, kay mga senior na, safe man tawon ni oy, miagi baya ni sa clinical trials, kana lang naa man gyud nay reaksiyon, vaccine gud," niya pa.

Bisan pa man sa mga negatibo ug positibo nga reaksiyon labot Covid-19 vaccine, pakusgan pa hinuon sa gobyerno ang kampanya aron makuha ang target ug tumong nga 99 porsiyento sa tanang Pilipino ang mabakunahan batok Covid-19.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph