Dear Atty. Joan,
Maayong adlaw, Atty. Joan. Duna unta koy ipakonsulta kabahin sa nahitabo sa akong batang babaye nga gidapatan ug gisingkahan sa iyang amahan.
Dugay nami nga naglahi og puyo sa akong bana human wa mi magkasinabot. Duna miy duha ka anak ug kinamanghuran ang babayeng biktima nga otso anyos.
Birthday sa akong ugangan niadtong Marso 2021. Mao nga nangadto mi sa balay sa pamilya sa akong bana aron mutambong sa selebrasyon.
Tungod kay dugay na nga wala nagkakitaay ang akong batang babaye sa iyang papa, kapila kini nga misuway og patagad sa amahan nga nagtagay uban ang mga silingan.
Kulit man gayod na ang mga bata ug kita man tingali tanan makasabot ana. Labaw na kon uhaw ang bata sa pagtagad. Apan dili ang iyang amahan.
Kay wa man gyod matagad og tarong sa iyang papa ang akong anak, wa sab mihunong ang bata sa pagpanguhit sa iyang papa.
Sa kasuko sa amahan, giwakli niya ang kamot sa bata ug gidapatan dayon niya ang maong bata. Gisiyagitan niya ang bata sa mga pulong: “Gasamok-samok ra ka diring bataa. Di ta ka anak!” Gibunlot pagkahuman sa akong bana ang iyang bakus ug gibunalan ang akong bata atubangan sa mga bisita.
Duna koy ebidensiya human nga misikreto og kuha og video ang katabang sa akong ugangan sa hitabo. Pwede ra man unta nga dili muabot sa inato nga sitwasyon. Nilakaw nalang mi aron dili magubot.
Human sa hitabo, nausab naman ang batasan sa akong bata. Nahimo na siya nga hilumon ug dili na interesado nga magdula kauban ang mga batang silingan. Wala na pod kiniy gana nga mu-answer sa iyang mga module.
Para nako, naka-apekto gayod kini sa akong bata. Ganahan unta ko nga mapanubag ang akong bana sa hitabo.
Ang akong pangutana mao kon mahimo ba nga makiha ang amahan og child abuse bisan pa man nga kausa ra nahitabo ang maong pagpangabuso?
Hinaut nga matabangan ko nimo, Attorney. Daghang salamat!
Imong magtatampo,
Diane
Dear Diane,
Maayong adlaw usab kanimo diha, Diane, ug salamat sa imong pagsunod niining lindog.
Subay sa imong saysay, gipasakitan sa imong bana ang inyong batang babaye pinaagi sa pagpanapat, pagpamunal ug pagpakaulaw atubangan sa daghang tawo human nga nagpatagad siya sa iyang papa samtang nag-inom kauban ang iyang mga higala.
Ang Child Abuse Law naghulagway og pipila ka mga klase sa pagpangabuso nga dunay silot sa matag akto. Mahimo kini nga pisikal o pinaagi sa pagstorya. Matawag kini nga pagpangabuso kon ang tumong sa akusado nga pakauwawan o dauton ang dignidad sa bata.
Wala gimando sa maong balaod nga kinahanglan kadaghan mahitabo ang pagpangabuso. Bisan pa man nga kausa ra nahitabo ang insidente, matawag gihapon ang maong kasinatian sa imong bata sa mga kamot sa iyang amahan nga child abuse.
Kon desidido kamo sa pagkiha sa imong bana, magpatabang kamo sa kapolisan nga maoy mu-assist sa pag-file sa kaso. Dad-a pod ang kopya sa video nga nakarecord sa maong hitabo ngadto sa polis aron mas malig-on pa ang inyong kaso. Tabangan kamo sa polis nga mafile ang kaso didto sa Prosecutor’s Office nga maoy muhukom kon dunay igong hinungdan ang maong reklamo nga masang-at sa husgado.
Daghang salamat, Diane, sa imong sulat tampo ug hinaot nakahupay ang maong tambag sa naghuot mo karon nga galamhan.
Imong alagad,
Atty. Joan