SUPERBALITA CEBU

Juntilla, Ochea nanginit sa dihang ARQ mibawos sa KCS sa Game One sa semis

Ang beteranong si Reed Juntilla sa ARQ Builders Lapu-lapu City Heroes nga padulong nang molusot niining aktoha. (Hulagway iya sa VisMin Cup)

SAKTONG dominasyon ang gipakita sa beteranong ARQ Builders Lapu-lapu City Heroes sa dihang ilang gipakgang ang KCS Computer Specialists-Mandaue City, 67-52, sa unang duwa sa Chooks-to-Go Pilipinas VisMin Cup semifinals series sa Civic Center sa lungsod sa Alcantara, Cebu Martes sa gabii, Mayo 4, 2021.

Niini, magtigi og balik ang duha ka koponan sa Miyerkules sa gabii alang sa rubbermatch diin niining higayona ang modaog otomatikong maoy makigsakbang sa nagpaabot nga MJAZ Zenit-Talisay City Aquastars alang sa best-of-three finals.

Naleksiyon sa ilang unang duha kapildihan sa mga kamot sa KCS sa elimination round, ang ARQ Builders misandig sa kalantip ug eksperiyensiya ni kanhi PBA player Reed Juntilla sa ilang opensa.

Si Juntilla mipakatap og 19 puntos, lakip na niini ang iyang four-point play sa tungatu gang bahin sa third quarter nga maoy nakabingat og maayo sa ilang labaw, 60-45. Milangkat usab siya og unom ka rebounds.

Gawas kang Juntilla, maayo usab kaayong nakatimang ang ilang bigman mga si Dawn Hynrick Ochea nga may 15 puntos ug 16 ka rebounds.

Nagsugod og arangkada ang Lapu-lapu City sa uwahing bahin sa second quarter ug misira kini sa first half, 39-29.

Dihay higayon nga misuway unta paggukod ang Mandaue City ubos sa pagpangulo ni ex-Pro Christopher Exciminiano, Al Francis Tamsi ug Jonel Bonganciso apan wala kini malahutay sa depensa sa Lapu-lapu City.

Si KCS coach Mike Reyes mihimog saktong rotation sa iyang mga player sa tinguha nga makakita og saktong kombinasyon apan daw sa wala modap-ig ang kagabhion kanila nga gani way bisan usa sa iyang mga batos nga naka double-figure.

Si Tamsi mitipig og nuebe puntos isip topscorer sa KCS samtang otso puntos lang ang nahimo ni Shaquille Imperial.

Mga puntos:

ARQ-Lapu-lapu (67) - Juntilla 19, Ochea 15, Senining 8, Tangkay 8, Lusdoc 6, Galvez 4, Mondragon 3, Arong 2, Minguito 1.

KCS-Mandaue (52) - Tamsi 9, Imperial 8, Exciminiano 6, Octobre 5, Mendoza 5, Sorela 5, Soliva 3, Delator 2, Roncal 2, Nalos 2, Mercader 2, Bonganciso 2, Cachuela 1. (JBM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph