Daghan ang naglibog.
Ngano man kaha nga istrikto man unta ang lalawigan sa Bohol mahitungod sa Covid-19 protocols? Dili modawat og bisita nga way negative swab result apan mao na man hinuon ang labing taas og Covid-19 cases sa Central Visayas.
Imbes mubo, naunsang pagkaunsaa nga mao na man hinuon ang highest pointer?
Unya ang probinsiya sa Sugbo nga luag ang Covid-19 protocols, mas ubos pa man hinuon kay sa Bohol?
Mao nay libog diha.
* * *
Sa homily ni Bishop Abet Uy niadtong miaging Mayo 1, Sabado, nga mao ang kapistahan ni Senor San Jose sa Dakbayan sa Tagbilaran, gibalik na sab niya paghisgot ang mahitungod sa pangurakot.
Gihimo niyang ehemplo ang mga hiyas ni San Jose nga usa ka trabahante nga nagpatulo sa singot aron maka-kwarta, dili parehas sa uban nga nakakuwarta man tuod apan kwartang ‘pinaspasan.’
Nagpaabot ang mga nanimbahay nga klarohon ni Bishop Abet ang maong saysay apan mao ra kadto ang iyang gihimo.
Blind item lang gihapon.
* * *
Buyno, masabot ra sab nato kon dili klarohon ni Bishop Abet kon kinsa gyod ang iyang gipasabot.
Sa maka-daghan nga panahon, kanunay pangutan-on si Bishop Abet kon kinsa gyod ang iyang gipalabtikan nga kurakot nga opisyal sa gobierno.
Apan mokatawa lang si Bishop Abet ug dili mohingalan sa iyang tirada.
Alang kaniya, igo na nga gisaysay niya sa mga katawhan ang gihimo sa maong kurakot nga opisyal, bahala na ang mga tawo nga mohukom kon kinsa gyod ang maong opisyal.
Buyno, kasagaran sa mga katawhan parehas og gidudahan.
Nagtuo ang kadaghanan nga ang gipasabot ni Bishop Abet usa ka politiko nga aduna nay record sa pagka-kurakot–pasabot nga nag-atubang na kini og mga kaso nga graft and corruption–unya padayon pa gihapon sa iyang gihimo nga panapi sa mga supplier.
Maila kini sa iyang pamaagi sa procurement–kasagaran niini pulos negotiated ug walay public bidding nga gihimo.
* * *
Bag-o pa lang gilahogay ang mga kaparian sa Diocese sa Tagbilaran.
Adunay mga parokyano nga nangalipay, aduna pod wa malipay.
Nalipay ang mga parokyano nga ang na-assign sa ilang parokya buotan, apan wa sab malipay ang uban kay sa ilang paminaw, aduna pay mas maayo nga angay unta i-assign sa ilang parokya.
Dili kini ikatingala.
Mao kini ang bug-at nga tahas ni Bishop Abet Uy–ang pagpangita sa assignment sa mga kaparian sumala sa iyang hunahuna nga makaayo sa mga parokyano.
Lisod baya kining trabahoa mao kini hinungdan nga nangayo si Bishop Abet og tabang pinaagi sa pag-ampo nga malamdagan ang iyang huna-huna samtang naghimo siya sa mga assignment.
Ang angay himuon sa mga katawhan, suportahan na lang nila ang ilang bag-o nga pari, iampo kini, tabangan sa mga kalihokan, imbes nga magbagutbot.