Usa ka maayong ehemplo ang pagpabakuna ni Cebu City Mayor Edgar Labella .
Daghan man gud ang senior citizens ang nahadlok sa bakuna nga adunay adverse reaksyon.
Karon nga ilang nakita ang pagpabakuna sa mayor maisog sila. Gawas niini daghan naman ang nagpabakuna.
Ang bakuna nga gigamit ni Labella mao ang Sinovac gikan sa China. Ang maong bakuna maoy gikahadlukan sa kadaghanan.
Sa wa pa ang bakuna, dihay higayon nga nag-walk and jog si Labella sa may IL Corso sa South Road Properties ( SRP).
Maayo ang gihimo ni Labella kay dunay pipila sa iyang mga kritiko o tigsaway ang miingon nga maglisud na og lakaw.
Kini maoy pagmatuod nga maayo pang molakaw ug nakadagan paman gani ang mayor.
Basta sagulan na gani og pulitika ang pulitiko, ang way sakit himoan og sakit. Ang pulitiko nga naayo na sa iyang sakit, padak-on pa ang sakit ug tungohon pa nga hapit na mamatay. Paita!
ABANTE BARANGAY
Nahinabi sa Agila si Atty. Totol Batuhan, ug mitug-an nga ang Abante Barangay nga iyang gipasiugdahan milusad sa community pantry.
Ang Abante Barangay nga usa ka non-governmental organization (NGO) dunay gibutang nga upat ka community pantry, matud pa ni Batuhan.
Niingon si Batuhan nga kini maoy hangyo sa ilang mga sakop sa pagbutang og community pantry sa Barangay Sambag 2, Mambaling, Bulacao ug Inayawan.
Gidugang ni Batuhan, magpadayon ang community pantry sa nahisgutang mga barangay samtang aduna pay nanginahanglan.
Si Batuhan ni-graduwar sa kursong abogasiya sa Harvard University sa Amerika.
Kanhi undersecretary sa kanhi Department of Transportation and Communication ( DOTC ) ug Director karon sa Bases Conversion Development Authority (BCDA).
Nakasaway sab siya sa pagpanghasi sa mga Insek sa West Philippine Sea. (Email: efrenlonzon71@gmail.com / Text: 09235562777)