SUPERBALITA CEBU

Editoryal: S-PaSS ni Labella

Editorial Cartoon by John Gilbert Manantan

DALAYGON ang tumong sa S-PaSS o Safe, Swift and Smart Passage nga polisiya nga gipatuman sa adiministrasyon ni Mayor Edgardo Labella. Usa ka rekisto sa tanang mobiyahe nga moagi sa puwerto sa dakbayan sa Sugbo.

Ning pamaagiha, mabahig ang mga pasahero nga moabot dinhi sa dakbayan ug kadtong moagi lang. Apan ang S-PaSS wala mapasabot sa publiko. Nagkalainlaing ang reaksiyon. Kadaghanan naghunahuna og dugang hasol kini sa pagbiyahe.

Dunay nagtuo nga ang walay S-PaSS mas malangay human moagi og mas higpit nga proseso, lakip sa pagpaubos sa swab test kon ang destinasyon mao ang dakbayan sa Sugbo. Mao kini nabaniog labina ang taga ubang rehiyon. Bisan ang ubang taga Sugbo.

Mas maayong mogahin og dugang panahon ang kagamhanan sa dakbayan sa pagpasabot bahin sa polisiya sa mga moabot sa dakbayan.

Daghang naglibog tungod sa padayon nga managlahing polisiya sa matag local government units (LGUs) bahin sa kampanya batok sa Covid-19.

Human ang Dakbayan sa Sugbo lang ang nagpatuman niini ug ang kakuwang sa tukma nga kasayoran, ang S-PaSS nahimong kataw-anan ug sama sa giduwaduwaan. Ug seguradong nakakuha ang dakbayan sa sayop nga data o lista sa nangabot sa dakbayan tungod sa diskarte sa mga pasahero.

Daghang nangabot nga ang destinasyon mao ang Dakbayan sa Sugbo, apan nikuha og S-PaSS nga naka-address sa lain dapit sa Sugbo tungod sa paglihay sa gituhoang kahasol kon ang destinasyon mao ang dakbayan.

Nganong maglahi man gud usab ang dakbayan sa ubang LGUs sa Sugbo? Dili epektibo kon walay kahiusahan.

Samtang kon napasabot og maayo ug walay usab-usab sa polisiya, ang katawhan seguradong mokooperar human ang gubat batok sa Covid-19 kaakuhan natong tanan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph