AKTIBO pang sakop sa Philippine Army nasikop sa anti illegal drugs operation sa Philippine Drug Enforcement Agency (PDEA) 8.
Giila sa PDEA ang ilang dinakpan nga si Army Sergeant Allan Aldy Siangco, alyas Marlboro.
Ang buy-bust gilunsad alas 4:30 sa hapon, Lunes, Mayo 3, 2021 sa Block 8, Lot 40, Kassel Homes, Tacloban City.
Usa ka asset sa PDEA ang nakigtransaksyon kang Siangko ug napalitan siya og usa ka pakete sa gituhoang shabu.
Sa dihang nagpositibo ang transaksyon, gideklarar sa mga sakop sa PDEA ang pagsikop sa suspek ug gipahibawo sa iyang mga katungod.
Gikapkapan si Siangko atubangan sa mga testigos gikan sa media ug opisyal sa barangay.
Matod sa PDEA, taudtaud na nila nga gipanid-an si Siangko tungod sa mga nadawat nga report nga nalambigit siya sa ilegal nga drugas.
Dugang sa PDEA, gikan ra sa Tacloban City ug lungsod sa Babatngon ang supply ni Siangco ug sa siyudad ang iyang area of operation.
Nakuhaan sab si Siangco og armas nga glock 9mm, unom ka mga magazine ug 69 ka mga bala.
Naa na sa kustodiya sa PDEA ang suspek ug gipasakaan na og kasong kalapasan sa Republic Act 9165 kun Comprehensive Dangerous Drugs Act of 2002. (JKDP)