MGA dakbayan sa Mandaue ug Lapu-Lapu mingpadayon sa ilang pagpamakuna sa senior citizens.
Ang Mandaue City nakadawat og 1,600 ka doses sa Sinovac gikan sa Department of Health (DOH) Central Visayas.
Nadawat sa Mandaue City Vaccine board ug Mandaue City Health Office ang 1,600 doses sa Sinovac niadtong Biyernes, Abril 30, 2021.
Matod ni Ernie Manatad, Mandaue City Vaccine Board Chairman ug Association of Barangay Councils president, nga gigahin nila ang 600 doses alang sa medical frontliners alang sa ilang second dose ug 1,000 doses alang sa mga senior citizen.
Sigon ni Manatad nga aduna na silay numero kon pila ka mga senior citizen ang ilang bakunahan sa matag barangay sa tanang 27 ka mga barangay.
Niadtong unang rollout sa pagpamakuna sa senior citizens, pipila lang ka mga barangay ang gisugdan na og bakuna. Kadto lang nakakompleto o anaa na sa 50 ngadto sa 70 porsyento ang narehistro.
Apan karon, tanan nang barangay ang aduna nay gahin nga bakuna alang sa senior citizens.
FRONTLINERS
Samtang gibutyag ni Grace Mary Carungay, city epidemiological and surveillance unit officer sa kagamhanan sa dakbayan sa Lapu-Lapu, nga nibalik na sila pagpamakuna sa mga senior citizen ug medical frontliners kagahapon, Mayo 4.
Kini human nahunong sulod sa duha ka semana gumikan kay nahurot ang gitaganang bakuna alang sa dakbayan.
Ang upat ka vaccination sites sa dakbayan mao ang Gun-ob Elementary School, Brgy Agus Gymnasium, ARC Hospital ug Sta. Rosa Hospital sa isla sa Olango.
Matod ni Carungay nga moabot sa 2,000 ka doses ang ilang nadawat gikan sa Department Of Health DOH-7 sa miaging weekend.
Ang 1,000 niini ilang itagana alang sa ikaduhang doses sa mga nabakunahan niadtong una nilang pagpamakuna.
Samtang ang laing 1,000 alang sa bag-o nga magpabakuna nga mga senior citizen ug medical frontliners.
Gibutyag ni Carungay nga kon sa miaging pagpamakuna nidawat sila ug person with cormobidities kun adunay mga gipamati, sa pagkakaron dili lang una kini nila tagaan og prayoridad.
Kini gumikan kay limitado paman ang bakuna nga ilang nadawat mao nga magbase lang una sila sa lista sa prayoridad base sa lagda sa DOH-7 nga mao ang mga senior citizens ug medical frontliners. (KFD, GCM)