Moabot sa 35 ka mga bus ang padaganon sa kadalanan sa Dakbayan sa Talisay nga magtanyag og libreng sakay alang sa mga health worker ug authorized persons outside residence (Apor) sa siyudad.
Nalakip sa Apor ang government workers, media practitioners, overseas Filipino workers, naa sa agribusiness ug agricultural workers, civil aviation-related personnel ug uban pa.
Si Jonathan Tumulak, pangu sa City of Talisay Traffic Operations and Development Authority (CT-TODA) nibutyag nga mahimo lang nga mopakita og valid Identification (ID) card ang mga Apor aron makasakay og libre.
Ang programa iya sa Department of Transportation (DOTr) nga Service Contracting Program ug gipaluyuhan sa kagamhanan sa Talisay ubos sa pagdumala ni Mayor Gerald Anthony Gullas.
Ang libreng sakay molungtad sulod sa duha ka buwan o kutob sa Hunyo 30, 2021.
Subay sa pahibaw sa CT-TODA, ni-issue og special permit ang Land Transportation Franchising and Regulatory Board (LTFRB) sa Central Visayas (LTFRB-7) nga nitugot pag operate sa 20 ka mga units sa Beep ug laing 15 ka units usab sa MyBus.
Ang mga Beep moserbisyo sa ruta sa Barangay Poblacion ug Tabunok paingon sa Dakbayan sa Sugbo. Samtang ang MyBus, dunay rota nga gikan sa Mactan Cebu International Airport (via Parkmall) paingon sa Dakbayan sa Talisay.
Ang MyBus moagi sa Cebu South Coastal Road (CSCR) paingon sa Dieparene St. (Sombria), Natalio Bacalso Avenue, corner Camella Homes, paingon sa dalan sa Starmall ug balik na usab sa CSCR ug MCIA.