Ang Cebu City Government moapud-apod sa financial assistance balor og P5,000 ngadto sa kapin o kulang 12,000 ka persons with disability (PWDs) karong Sabado, Mayo 8, 2021.
Kini ang gipahibawo ni Mayor Edgardo Labella para sa buwan sa Enero hangtod Mayo niining tuiga sanglit nahumab na og dawat sa ilang ayuda ang kapin 80,000 ka mga senior citizens sa niaging buwan.
Sama sa naandan, ang distribution ipaagi sa house-to-house aron usab malikayan ang tapok sa daghang mga tawo ug maluwas gikan sa Covid-19.
“Malipayong nakong ipahibawo nga magsugod na ang distribution sa financial assistance alang sa mga persons with disabilities (PWDs) karong Sabado, Mayo 8,” tipik sa post sa Facebook ni Labella.
“Each PWD beneficiary will be receiving a P5,000 cash aid for the months of January to May, aron intawon duna silay magasto aron pagpalit sa ilang needs, sama sa maintenance nila ug nutritious nga pagkaon,” dugang sa mayor sa iyang post.
Ang paghatag sa ayuda sa PWDs natingob gumikan sa pandemya dala sa coronavirus disease 2019 (Covid-19).
Sama sa mga senior citizen sa dakbayan, ang PWDs adunay financial assistance nga P12,000 sa usa ka tuig apan P1,000 ang ihatag matag buwan gikan sa Cebu City Government subay sa napasar nga lokal nga balaud. (PAC)