Balor og P1.3 milyunes nga ilegal nga druga ang nasakmit sa City Intelligence Unit (CIU) sa Lapu-Lapu City Police Office (LCPO) gikan sa usa ka construction worker atol sa buy-bust sa Sitio Mustang, Barangay Pusok niadtong Martes, Mayo 4, alas 5:00 sa buntag.
Ang dinakpan nailhang si Ronie Dadula Cuizon, 35, construction worker, ug molupyo sa dan A. Lopez, Barangay Labangon, Dakbayan sa Sugbo.
Matod ni Police Colobel Arnel Banzon, direktor sa LCPO, nga si Cuizon nga gihulagway nga usa ka high value Individual (HVI) maoy gitug-an sa ilang miaging mga dinakpan nga ilang kuhaan sa ilegal nga druga.
Giingong nanarbaho kini isip construction worker sa dakbayan apan, nag-sideline og baligya sa ilegal nga drugas
Giingong gikan usab sulod sa bilanggoan ang supply sa dinakapan sa ilegal nga druga.
Nakuha gikan sa posisyon sa dinakpan ang moabot sa siyam ka mga pakete sa gituohang shabu nga gisulod sa usa ka sling bag nga gibanabanang motimbang og 200 gramos.
“Kung baga gikan sa prisohan murag ni og nagtrabaho sa networking siya nga daghan sila magkuhaan didto unya sila usab ang mo-distribute na sa ubos. Dinagko ni iyaha kay maka-dispose man ni siya og 25 grams per week,” matod ni Banzon.
Sumala sa LCPO, walay koneksyon ang dinakpan sa mga nasikop sa miaging mga semana nga nakuhaan usab og minilyon nga kantidad sa ilegal nga druga. (GCM)