SUPERBALITA DAVAO

Delos Reyes: Ulipon sa utang kabubut-on

Yanong Pagsabot

TUNGOD sa Covid-19, mas nahimong hiniktan ang kagamhanan ni President Rodrigo Duterte sa nasud China.

Gipakasama sa nagapos ang mga kamot sa kagamhanang Pinoy ug walay katakus pagsanta sa pagpanghilabot sa mga Tsino sa mga teritoryo sa atong nasud sa South China Sea tungod kay utangan ta sa ila.

Daghan ang nalingla sa mga Pinoy nga daw gitugotan ni President Digong nga mosulod ang mga langyaw nga mga Intsik ug panghimuslan ang mga bahandi sa atong nasud.

Mga kanhi naghupot sa katungdanan sa milabay nga administrasyon ni President Benigno Aquino III, maoy nanguna sa pagbatikos kang Pangulong Digong nga nagpabaya sa iyang trabaho aron tabunan ang kapalpakan nga ilang gibuhat diin ubos sa ilang panahon nahitabo ang pag-angkon ug pag-ukopa sa mga Tsino sa Scarborough Shoal nga nakapalig-on sa ilang presensiya diha sa West Philippine Sea.

Ubos sa pamunoan ni President Digong, iyang nakita nga walay katakus ang kasundalohan sa atong nasud nga makig-giyera sa China.

Hinuon, iyang gipalig-on ang pakighigala sa maong nasud ug gisuklian sab sa ubay-ubay nga mga proyekto ang kaayo nga ilang nadawat.

Usa sa dakong tabang nga gihatag sa nasud China mao ang mga Covid-19 vaccine nga gibakuna sa Pinoy aron mahimong makampanti sa kahimtang nga makabaton og panagang karong panahon sa pandemya.

Ang nakaapan karon mao si Senador Manny Pacquiao nga deputy president sa political party ni President Digong, apil sa nagpangita sa gisaad sa presidente nga mosakay siya sa jetski aron ipatindog ang bandila sa nasud sa mga isla nga ginaukopa sa China sa West Philippine Sea.

Lahi kuno ang saad ni President Digong niadtong panahon pa sa iyang pagpangampanya sa iyang mga lakang karon.

Matuman ba kaha ang saad ni President Digong nga lahi na nga sugilanon kon ugaling hilabtan na sa China ang mga bahandi ug mga minerales diha sa kadagatan. Makapugong pa ba kaha siya kon magsugod pagkalot ang mga Tsino aron panghimuslan ang mga minerales ilalom sa dagat?

Duna nay kasabutan ang Pilipinas ug ang East Asian giant alang sa pagpadayon sa oil exploration sa West Philippine Sea apan Pebrero 21 pa ang katapusan nga balita nga atong nadunggan ug wala pa nasundan.

Daghan ang nagaampo nga unta magmalampuson ang maong oil exploration uban ang paglaum nga basin makalingkawas na ang nasud gikan sa daghang mga utang kay dunay panultihon nga "ulipon ang nakautang sa iyang nautangan."

Usa sab sa mahimong balakid sa gawasnon nga paglihok ang atong panglantaw sa utang kabubut-on kay tungod niana, sila nga atong nautangan og kabubut-on daw maoy gamhanan nga maoy naghupot sa katungod ug igo na lang ta sa pagtuman.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph