MIABOT na og 50 ka mga tawo ang nagpositibo sa novel coronavirus human mitambong og haya sa patay sa usa ka barangay sa President Roxas, North Cotabato.
Kini maoy gikompirma ni Integrated Provincial Health Officer (Ipho) Dr. Eva Rabaya didto sa Barangay Idaoman sa nahisgutang lungsod atol sa tigum uban sa Inter-Agency Task Force (PIATF-Cotabato).
Matud ni Rabaya nga duna pay laing 93 ka mga tawo ang gipailawom sa swab test, kon diin 78 niini nakolekta na sa Ipho-Cotabato uban ang Department of Health-Soccskargen.
Gipamahayag ni President Roxas Mayor Jonathan Mahimpit nga nagpatuman na sila og focus containment sa barangay nga sentro sa mga nataptan sa kagaw.
Giklaro sab ni Municipal Health Office Chief Dominic Laus nga duna nay sistema nga gipatuman sa lugar aron maayudahan ang mga tawo og pagkaon ug panginahanglan sa panimalay.
Gihingusgan sab ang contact tracing sa mga tawong nakatambong sab sa haya sa wala gibutyag nga bansagon sa namatay.
Sumala pa nga pipila sa mga nanambong sa haya nag-inom ug usa lang ka baso ang gipasa-pasa sa mga kainom.
Samtang aprobado na sa PIATF ang pagmugna sa sistema tali sa LGU aron matabangan ang President Roxas sa kinahanglan nga isolation facility, contact tracing ug dugang nga health personnel.
Nagsugod ang pagdaghan sa mga nagpositibo sa makatakod nga sakit sa President Roxas tulo ka adlaw human mitambong sa lamay sa nahisgutang barangay kung diin ang uban, matud pa, nagagikan sa Davao City, Bukidnon ug General Santos City. (Edgar E. Fuerzas)