GIMANDOAN sa opisyal gikan sa Davao Regional Inter-Agency Task Force for the Management of Emerging Infectious Disease (RIATF) ug Regional Task Force Against Covid-19 (RTF) ang tanang mga mayor sa rehiyon nga mopagawas sa ilang tagsa-tagsa ka mga executive order (EO) sa "region-wide border control" sa daling panahon.
Si Department of Interior and Local Government-Davao Region (DILG-Davao) Director Alex Roldan, kinsa mao sab ang pangulo sa RIATF, nagsulti sa press conference Miyerkules, Mayo 5, 2021, nga ang mayor lang ang dunay awtoridad nga ipatuman ang resolusyon pinaagi sa pag-isyu og EO, lakip na ang pag-imposar sa petsa sa implementasyon.
"Ang LGU ang naay sole power to implement rules didto sa iyang [jurisdiction]. Wala man mi legal basis because temporary ra man ang nature aning Task Force [RIATF], that is why it still relies on the LGU to implement it kay sila man naa sa constitution nga gitagaan og authority to regulate," batbat ni Roldan sa press conference kagahapon.
Tin-aw niya nga ang RIATF ug Regional Task Force Against Covid-19 (RTF) tiggama lang og polisiya.
Giklaro ni Roldan nga ang hiniusang border control di makababag sa mga nagama nang mga polisiya sa Covid-19 sa mga lokal nga panggamhanan, ug ang mga mayor gihatagan og gahum nga modugang og mga probisyon, basta di lang motipas sa resolusyon.
Matud niya nga mga mayor kinsa di mopagawas sa ilang mga EOs, hatagan og "show cause order" ug mag-esplikar nganong di niya kini ipatuman. Hinuon di sila makapasaka og kaso batok kanila. (Ralph Lawrence G. Llemit)