Usa ka multi-sectoral group ang nagtukmod ni Gov. Gwen Garcia nga padaganon isip senador karong sunod tuig nga eleksiyon. Kining maong grupo gilangkuban sa usa ka community organizer, radio commentator ug kanhi commissioner sa Commission for the Urban Poor Edward Ligas, mga presidente sa duha ka vendors organizations sa Carbon Market nga sila si Maria Inday Pino ug Erwin Goc-ong, ingon man ni Neil Papas, municipal administrator sa Lungsod sa San Farnando ug Marissa Rabin, usa ka empleyado sa Kapitolyo.
Matod sa grupo nga sa kasamtangang pulitiko dinhi sa Sugbo way laing highly qualified ug usa ka maayong materyal sa pagka-senador. Wala nay Bisayang Dako (Bisdak) o taga Sugbo sa Senado karon. Adunay mga Bisaya apan kadaghanan kanila taga Mindanao sama kang Koko Pimentel nga taga Cagayan de Oro, Migs Zubiri nga taga Bukidnon, Bato dela Rosa ug Bong Go taga Davao. Si Franklin Drilon, Ilonggo og kagikan. Si Serge Osmeña maglisod na og daug.
Well, way kuwestiyon ana kon qualifications ang hisgutan. Mas maayo pa si Gwen anang uban nga mga senador karon. Intelihente ug articulate. Kini gong magpanday og balaod, debate ug intellectual discussion man god ni. Makamao si Gwen ana kay nahimo god siya nga kongresista sulod sa duha ka termino. Siguradong maka-depensa siya sa iyang isang-at nga mga balaudnon sa bisan asang forum.
Kon molansar si Gwen sa pagka-senador, iyang mabiyaan ang Sugbo. Medyo tungason. Dili lalim nang mangampanya ka sa tibuok Pilipinas ug ang gasto sa pagpangampanya. Nagkinahanglan kag dako-dakong pundo ug igong panahon. Tinuod dako natong garbo nga adunay Bisaya nga senador, apan tibuok Pilipinas na usab ang konstituwente ug dili tanan mabubo ang mga mihuras dinhi sa Sugbo kay masuko ang taga laing lugar.
Kon magpapili pag-usab si Gwen sa pagka-gobernador, iya gihapon nga makab-ot ug maangkon ang maong posisyon sa tumang kasayon. Aber, kinsa man ang mangahas nga mokontra kaniya? Matupngan man gani siya apan dili hilabwan ang iyang performance. Mas maayo pa nga magpabilin una si Gwen dinhi sa ato aron mapalambo gyud og maayo ang atong pinalanggang Sugbo. (bobbygnalzaro@gmail.com)