Niinsister si Gobernador Gwendolyn Garcia sa pagpadayon sa pagpatuman sa iyang Executive Order 17 nga naglatid sa mubo nga quarantine period sa mga overseas Filipino workers (OFW) ug returning overseas Filipinos (ROF). Gusto man gud sa nasudnong kagamhanan nga ipasunod kon unsa may policy nga gipatuman sa National Inter-Agency Task Force (NIATF).
Mas taas ang quarantine period alang sa mga OFW ug ROF kay kinahanglan motuman sila sa 16 ka adlaw nga pagpuyo nga isolated. Kini nisangko sa mas dakong gasto sa kagamhanan kay matag tawo gastuhan og P3,000 matag adlaw kun P48,000 matag usa sulod sa 16 ka adlaw.
Mao ni ang naproblemahan ni Labor Secretary Silvestre Bello ning bag-ohay lang kay ang nahabilin nga pundo sa Overseas Workers Welfare Administration (Owwa) naa na lang sa P1.4 billion.
Si Garcia nipasabot nga ning iyang paagi, ang mga OFW ug ROF nga taga Sugbo di na magastuhan og dako sa kagamhanan sa ilang pagpuyo sa hotels sa ilang pag-uli. Kon sila negatibo sa RT-PCR test, tulo ka adlaw ra silang makapuyo sa isolation, makauli na sila sa ilang balay.
Matod ni Garcia nga makadaginot ang kagamhanan sa galastuhan. Sakto kaayo.
Gawas niini, mas taas na ang panahon nga ilang ikauban ang pamilya nga maoy labing dako nilang katuyoan sa pag-uli dinhi.
Ang pag-uli sa mga OFW ug ROF di maoy hinungdan sa pagsaka sa mga kaso sa coronavirus disease (Covid-19) sa Sugbo ning pipila ka nanglabay nga mga buwan. Ang mga holiday, diin di kalikayan ang mga tapok, maoy numero unong hinungdan.
Busa, way sayop sa lakang sa gobernador, hinunoa dako kini og natabang sa nasudnong kagamhanan nga makadaginot sa pundo ug palas-unong kalbaryo sa quarantine sa manguli nga mga Pinoy. Ang pait kay pasundon ang Sugbo sa polisiya nga way ayo, nagpiit pa sa yanong mga tawo.