SUPERBALITA CEBU

KCS-Mandaue mipalagpot sa ARQ-Lapu-lapu; sud sa finals batok MJAS-Talisay

Hulagway iya sa Chooks-to-Go

GIPAKAGING sa KCS Computer Specialists-Mandaue City ang ARQ Builders-Lapu-lapu City Heroes sa knockout semifinal match sa Chooks-to-Go Pilipinas VisMin Super Cup sa Alcantara Civic Center sa lungsod sa Alcantara, Cebu kaganiha, Miyerkules, Mayo 5, 2021.

Si Gryann Mendoza maoy nahimong sentro sa opensa sa Mandaue human kini mikulit og 25 puntos, lima niini gikan sa three-point area, ug may walo ka rebounds nga igo na kaayong nakatuboy sa Computer Specialists ngadto sa finals.

Ilang ikasangka sa best-of-three series ang wa pay pildi nga MJAS Zenith-Talisay City Aquastars nga sugdan karong Biyernes, Mayo 7, 2021.

Sukwahi sa ilang pagkapukan sa Game One, 67-52, ang Mandaue City sayo nga mipakita sa ilang kaagresibo sa depensa nga nakapakurat sa Lapu-lapu City.

Gani sa first quarter pa lang ila nang naposte ang 13 puntos nga labaw, 28-15, ug nabingat pa kini ngadto sa 46-32 sa halftime.

Sa first half pa lang, si Mendoza aduna nay 15 puntos. Miayuda kaniya sa ilawom nga bahin si Monic Soliva ug Dyll Roncal kinsa nakatampo usab og singko puntos matag usa sa maong quarter.

Daw og sa naa sa yanong kadaugan ang KCS sa dihang nakaposte kini og 60-45 nga bintaha. Apan sa kalit lang mikid-op ang maong kahayag sa dihang ang beteranong ex-pro nga si Jojo Tangkay sa ARQ milusad og dakong rally nga naghudlat sa Mandaue City.

Ang technical free throws, usa ka tres sa walang bahin, ug lusot ni Tangkay maoy nakapasikit sa score, 62-64, 3:27 segundos ang nahabilin sa duwa.

Sa tinguha nga dili mausik ang iyang kahago, si Mendoza miduslit sa ilang kaugalingong rally pinaagi sa iyang short jumper aron pag-inat og balik sa labaw, 66-62.

Miayuda ni Mendoza ning higayona sila si Alfrancis Tamsi ug Mchole Sorela nga maoy naghatag og kasiguroan sa ilang kadaugan.

Way laing naka double-figure sa KCS. Si Tamsi nga maoy nagsunod ni Mendoza sa scoring igo lang mipakli og siete puntos.

Sa kampo sa Builders, ning higayona wa kaayo makabuylo si Reed Juntilla ang usa sa ilang leading scorer.

Si Juntilla nga nag-average og 22.6 points sa niaging tulo ka duwa, igo lang mitapik og 13 puntos samtang 12 usa ang napupo ni Tangkay.

Laing naminusan sa ilang produksiyon si Dawn Ochea. Sa Game One si Ochea aduna 15 puntos ug 16 ka rebounds apan ning higayona nalimitahan lang siya sa 11 puntos ug lima ka rebounds.

MGA PUNTOS:

KCS-Mandaue City (74) - Mendoza 25, Tamsi 7, Imperial 6, Sorela 6, Soliva 5, Exciminiano 5, Nalos 4, Bregondo 4, Roncal 3, Bonganciso 2, Cachuela 2, Delator 0, Mercader 0, Castro 0.

ARQ-Lapu-lapu (64) - Juntilla 13, Tangkay 12, Ochea 11, Canada 6, Berame 6, Lusdoc 6, Minguito 4, Mondragon 3, Galvez 2, Arong 1. (JBM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph