Moabot na lang sa 29 ka mga aktibong kaso sa Covid-19 ang natala sa Cebu City Emergency Operations Center (EOC) sa Barangay Guadalupe, Dakbayan sa Sugbo.
Sa 80 ka mga barangay sa siyudad, 24 ang way natalang bag-ong transmisyon sa Covid-19 sa nakalabay nga 10 ka adlaw samtang sa 56 ka barangay, usa ka kaso ang labing ubos, samtang 29 ang labing taas.
Na-record usab sa EOC niadtong Mayo 4 ang siyam ka bag-ong mga kaso sa coronavirus disease 2019 (Covid-19) sa usa ka adlaw, maoy labing ubos sukad niadtong Enero.
Sa kinatibuk-an, ang Cebu City aduna na lay 558 ka aktibong mga kaso sa nilabay nga 10 ka adlaw.
Nagsunod sa Barangay Guadalupe mao ang Lahug (28), Tisa (21), Apas (20), Labangon (20) nga maoy naglangkob sa top 5 barangays nga adunay active cases sa nakalabay nga 10 ka adlaw.
Samtang ang mga barangay nga adunay tag usa ka kaso mao ang Budlaan, Ermita samtang tag duha ang kaso sa Barangay Tinago, T. Padilla, Suba, Sto. Niño,Pulangbato, Pasil, Duljo Fatima ug Day-as.
Sa kinatibuk-an, niabot na og 23,498 Covid cases ang Cebu City gikan niadtong Marso 2020 apan naayo na ang 22,096 kun 94.03 positivity rate samtang 844 ka individual nangamatay kun 3.59 % mortality rate.
Bisan pa ning pag-ubos sa mga kaso, si Mayor Edgardo Labella mipahinumdom sa katawhan sa di pagkompyansa kay naa pa ang Sars-CoV-2, kagaw nga nagdala sa Covid-19.
Iya usab nga gipasalamatan ang katawhan sa padayong pag-obserbar sa mga health protocol.
"Labing mapasalamaton usab ko sa katawhan for the cooperation in observing our health protocols kay niubos gayod atong positive cases karon. Ato lang gyud hinumdoman nga bisan kon nabakunahan kita, dili ta angay magkumpiyansa. Padayon gihapon ta og sul-ob sa face mask ug face shield and observe social distancing kay dili intawon kumpleto ang proteksyon sa vaccine if mapasagdan kini," nagkanayon ang mayor.
Si Labella, 69, nagpabakuna niadtong Martes, Mayo 4, 2021 og Sinovac isip senior citizen. (PAC)