ONSE ka tawo ang nangaangol dihang ang mini bus nga nilihay sa gikasugat nga Ceres bus, nibangga sa delivery truck ala 1:45 sa hapon sa Miyerkules, Mayo 5, 2021, sa Brgy. Abugon, Lungsod sa Sibonga, habagatang Sugbo.
Nagusbat ang atubangan sa Alowie Mini Bus (0908) nga gimaniho ni Armando Estomago, 35, ulitawo, taga Brgy. Bahay, Lungsod sa Sibonga.
Samtang ang likod sa Isuzu truck (GTR-6678) nga gimaniho ni Jose Maria Bataller Fantonial, 34, ulitawo, taga Brgy. Napo, Dakbayan sa Carcar, nadaut usab.
Si Police Staff Sgt. Leon Gesim sa Sibonga Police Station nga nahinabi sa Superbalita Cebu, nagkanayon nga ang delivery truck naghatod og sinakong bugas sa lugar. Naka-park kini sa daplin sa karsada, ang dulong nag-atubang sa south.
Samtang ang mini bus gikan sa Dakbayan sa Sugbo nga dunay mga pasahero paingon sa Lungsod sa Sibonga.
Giingong naghaguros sa pagpadagan ang mini bus sa national highway.
Si Estomago niasoy sa kapulisan nga sa iyang pag-abot sa dapit, kalit nga nibutho ang Ceres mini bus hinungdan nga iyang gilihayan aron di sila magkabangga.
Apan apeke na hinungdan sa pagkadusmo sa iyang gimaniho ngadto sa lubot sa delivery truck. Gumikan sa kakusog sa impact, nabungkag ang atubangan sa mini bus.
Onse ka mga pasahero ang nangaangol ug nadala sa tambalanan sa Lungsod sa Argao.
Nakagawas ang siyam, gawas lang sa duha ka mga pasahero nga ipaubos CT scan.
Ang duha giilang sila si Judith Candole, 50, taga Pinamungajan ug kuyog nga si Mark Noval.
Si Estomago wa naangol. Ang truck boy sa delivery truck nga si Marjun Somile, 28, ulitawo, taga Poblacion, Dakbayan sa Carcar naangol.
Matod pa ni Gesim,daghan nang nadisgrasya ani nga dapit kay tanos kaayo ang karsada.
“Kusog man gyud nang mga mini bus diha mopadagan. Unya kalit mang nisulpot ang gikasugat, wala na siyay nahimo, nabangga sa nagparking,” dugang ni Gesim.
Sila si Estomago ug Fantonial gi-hold sa kapulisan samtang gipaabot ang mga tag-iya sa pag-abag sa mga biktima.