Kulba dalang kahinam ang gipaabot nga masaksihan sa dihang sugdan na sa Biyernes, Mayo 7, 2021 ang best-of-three finals tali sa KCS Computer Specialists-Mandaue City ug MJAS Zenith-Talisay City Aquastars sa naghinapos nga Chooks-to-Go Pilipinas VisMin Super Cup sa Civic Center sa lungsod sa Alcantara, Cebu.
Lab-as pa gikan sa ilang pagpalagpot sa ARQ Builders-Lapu-lapu City Heroes, 74-64, sa semis niadtong Miyerkules sa gabii, ang Computer Specialists mosulod sa korte nga underdog batok sa MJAS nga wala makatilaw og kapildihan sa elimination round nga maoy otomatikong naghatod kanila sa finals.
Apan alang sa Computer Specialists ang ilang dakong kadaugan batok sa beteranong ARQ Builders ang nakapalig-on sa ilang moral.
Hinuon gituohan nga ang hataas nga pagpahuway sa Talisay City posibling makaapekto sa ilang dinuwaan karong gabii.
Apan ang triggeman sa Talisay nga si Patrick Cabahug malaumon nga dili makapugdol sa ilang performance ang hataas nga pahuway.
"Depense lang ug play as a team. We will play hard lang to win the games and one game at a time. Siguro dili siya makaapektar sa amo kay sa 6 days namo na break we play hard basketball gihapon." matod ni Cabahug, usa ang leading scorer sa Aquastars.
Human na sweep ang tanang napulo kaduwa sa elimination round, ang Talisay otomatikong nasulod sa finals ug midagan pa og unom ka adlaw silang nagpaabot kon kinsa ang ilang makontra.
Sa gihapon, si KCS coach Mike Reyes mosandig sa iyang main man nga si Gryann Mendoza kinsa maoy nahimong mahait nga hinagiban sa pagpalagpot sa Lapu-lapu City.
Kaabag ni Mendoza sa ilawom nga bahin mao sila si Rhaffy Octobre, Dyll Rosal, McHole Solera, Jonel Bonganciso, Bernie Bregondo ug Red Cachuela.
Samtang sila si Joseph Nalos, Gileant Delator ug Christopher Exciminiano ang modumala usab sa backcourt area sa Mandaue.
"Wala mi ga-expect nga maka-abot mi ani ky sa line up that we have nausab unya daghan nawala kay dili availble but God give us the riaght person that can play hard for the team," matod sa team-owner nga si Ricky Verdida.
"The only motivation that we gave to our players is to trust the system and sa coach but most specially trust kay God who gives us strength sa tanan duwa namo," dugang sa batan-ong sportsman/businessman.
Sangkap sa mga inilang magduduwa nga aduna nay igong pangalan, gawas kang Cabahug anaa usab ang seasoned guard nga si kanhi PBA player Paolo Hubalde nga abagan usab nila ni Hezy Val Acuna, Kevin Ray Villafranca, Jaymar Gimpayan.
Gipaabot nga makahatag usab og suporta ang mga locals nga sila si Darell Shane Menina, Joshua Dela Cerna. Anaa usab sila Dave Moralde, Allan Dominic Santos, ug Lugie Cuyos.
Ang Game Two duwaon ugma (Sabado) ug kon dunay Game Three ipahigayon kini sa adlawng Dominggo. (JBM)