GIKONSIDERA sa Davao City Health Office (CHO) ang paglugway sa libreng swab testing sa tanang mga drayber sa pampublikong transportasyon ug delivery services human nga moabot lang og mga 2,300 sa gitumong nga 21,000 ka mga drayber nasusi sukad Mayo 3.
Ang free swabbing nagsugod niadtong Abril 26, subay sa Executive Order (EO) 22 nga giisyu ni Mayor Sara Duterte-Carpio nga maghatag og libreng Covid-19 swab testing sa tanang mga drayber ug delivery service sama sa taxi drivers, van drivers, air conditioned ug non-air conditioned jeepney drivers, habal-habal drayber, tricycle drivers, bus drivers, ug uban pa.
Gilusad ang libreng testing gikan alas 8:30 hangtud sa 11:30 sa buntag didto sa Davao Crocodile Park gilaumang mahuman ugma, Sabado, Mayo 8.
Ang paglugway sa libreng swab testing aron nga mahatagan pa og oportunidad tong uban nga wala pa nagpa-test.