MIABOT na sa 5,182 ang kinatibuk-ang ihap sa mga kumpirmadong kaso sa Covid-19 sa Cagayan de Oro human 70 ka mga residente sa dakbayan ang mipositibo sa novel coronavirus, sumala sa report sa City Health Office Huwebes, Mayo 6.
Sumala ni Acting City Health Officer Dr. Lorraine Nery, sa 70 ka mga bag-ong lokal nga mga kaso, 27 ang mga close contacts sa mga pasyenteng nagpositibo sa coronavirus, siyam ang mga lokal authorized persons outside residence (Apors), 32 ang mga local index nga mga kaso, ug duha ang mga patay.
Sa 5,182 nga kinatibuk-ang kaso sa Covid-19 sa syudad, 438 ang mga returning overseas Filipino workers/locally stranded individuals (ROFs/LSIs) ug 4,744 ang mga local transmissions.
Ang Cagayan de Oro adunay 640 ka mga active cases, 140 niini na-admit sa Northern Mindanao Medical Center ug uban pang mga ospital sa syudad, 496 ang mga outpatients, ug upat ang mga ROFs/LSIs.
Nakatala usab og 36 ka mga coronavirus-positive nga mga kaso nga karon naka-recover. Anaa na karon sa 4,318 ang ihap sa mga nakarekober nga mga kaso sa dakbayan.
Sa maong numero, 310 ang mga LSIs, 122 ang mga ROFs, ug 3,886 ang mga lokal nga kaso (community: 3,301; Apors: 585).
Ang recovery rate sa Cagayan de Oro anaa na sa 83.32 percent.
Ang ihap sa mga namatay sa Covid-19 sa syudad naa sa 224.