Nasubo na sab ang entertainment scene sa pagpanaw sa batikan nga magsusulat nga si Ricky Lo niadtong Martes sa edad nga 75.
Niadtong Abril 6, unang nibabu ang laing magsusulat nga si Nestor Torre Jr. sa edad nga 78.
Pulos respetado tungod sa ilang kamaayo mosulat ug kamapaubsanon bisan pa man kon nakab-ot nila ang hataas nga pwesto sulod sa panahon nga ilang gigugol sa propesyon.
Di pa lang sab dugay, nipanaw ang mga icon sa musika nga sila si Claire dela Fuente ug Victor Wood.
Nagpakita lang kini nga wa gyuy mogamot bisan unsa pay kahimtang ning kalibutan.
Pahuway sa kalinaw, mga idolo!
Gawas sa panawagan nga suportahan siya pinaagi sa pagboto online, nihangyo usab si Ms. Universe Philippines 2020 Rabiya Mateo nga undangon sa pipila ka mga Pinoy ang pag-bash sa ubang kandidata labina ang mga potential winners.
Sumala sa Google, sa tanang mga kandidata kon siya kunoy pagbut-on, gusto siya nga mahimong roommate ang Ms. India aron masinati niya ang kagikan niini ug masabtan usab niya ang kagikan sa iyang amahan.
Duna diay gipahuwam si Ms. U 2015 Pia Wurtzbach kang Rabiya, usa ka paresan nga ariyos.
Mao kuno kini ang ‘anting-anting’ nga iyang gihuptan karon.
Iya usab nga gisunod ang tambag ni Pia nga di ablihan ang iyang social media aron di siya maapektohan sa unsa may gisulat nga dapig o batok kaniya.
Hinaot nga malangkat ni Rabiya ang ikalimang korona karong Mayo 17.
Daghan ang nakapangutana nganong gibuhian sa GMA 7 si Sunshine Dizon nga unta usa kini sa maihap lang nga artista sa Kapuso Network nga tinuod gyud nga aktres.
Hinoon, mainitong gidawat sa ABS-CBN si Sunshine ug si Jake Ejercito. Gani, matod pa ni Sir Aaron Domingo, apil ang duha sa umaabot nga teleserye nga Marry Me, Marry You uban nila ni Paulo Avelino, Janine Gutierrez, Cherry Pie Picache, Vina Morales, Teresa Loyzaga, Lito Pimentel, Joko Diaz, Jett Pangan, Edu Manzano ug mga batan-ong artista.
Kini ang unang teleserye ni Jake ubos sa direksyon nila ni Jojo Saguin ug Dwein Ruedas Baltazar, makita ang Marry Me, Marry You sa lainlaing platforms sa Kapamilya Network.
Gisaulog sa Immaculate Conception Oslob Parish niadtong Martes, Mayo 4, ang ika-191 nga kasumaran sa pagkatukod sa simbahan niini.
Human sa misa, nisunod ang mini-concert nga Gasa nga nipakita sa mga hinatag sa Labawng Makagagahom alang sa mga Oslobanon.