Ang pagka-isug ni Lapu-Lapu maoy kanunay nga ipasigarbo sa mga lumad nga Oponganon. Ato usab kini nga gibarugan pinaagi sa pagpasidungog kaniya nga
labing unang bayani nga mipugong sa mga langyaw nga buot unta mosakop kanato. Si Antonio Pigafetta, usa ka Venetian scholar ug explorer, mikuyog ug nagsilbing chronicler ni explorer Ferdinand Magellan, sa iyang paglawig sa Spice Islands ubos sa bandila ni Hari Charles I sa Espanya. Nasamdan si Pigafetta sa Mactan diin napatay si Magellan. Naayo ang iyang samad ug usa siya sa 18 ka mga sundawo nga mikuyog kang Juan Sebastian Elcano sakay sa Victoria balik sa Espanya.
Sa iyang sinulat, iya nga gihisgutan si Datu Lapulapu sa Mactan. Daghang mga sinulat nga sukwahi sa kang Pigafetta, nga nakakita gayud sa Battle of Mactan.
Mao man gani nga hangtud karon ang account ni Pigafetta maoy gituhoan sa NHCP.
Apan si Senador Bong Go nga usa ka pinasidunggang dinapit sa pagsaulog sa 500 th anniversary sa Battle of Mactan sa iyang diskurso miingon man nga si
Lapulapu usa kuno ka Tausog nga gisugo sa Sultanate sa Sulu sa pag-anhi sa Mactan aron pagsuta sa mga langyaw nga nangabut dinhi. Gisaway siya sa mga netizens apan wala gayuy tingog si Lapu-Lapu City Mayor Ahong Chan, Kongresista Paz
Radaza ug ang kadagkuan sa dakbayan sa Lapu-Lapu. Nangayo man tuod og pasaylo si Sen. Go, apan way klaro. Isog kaayo kining maong mga opisyal sa dihang dihay kwestiyonable nga ads sa baby diaper ug si Mayor Chan ug ang mga konsehal sa dihang usa ka rapper mi-awit nga si Lapulapu gipunggotan og liog. Isug ba lang sila kon ordinaryong mga tawo ang ilang kaatbang ug kurog sila kang Sen. Bong Go? Hangtud karon mingaw pa sa Tirana ang atong kadagkuan sa maong siyudad.
Human mipalabay sa unang batch sa pagpamakuna sa senior citizens tungod kay wala ako makauyon sa pamaagi sa pagrehistro sa angay bakunahan, nagpabakuna ako niadtong Martes. Akong gisiguro nga marehistro ako online sa www.PabakunaTa.com. Tungod kay giingnan ko ni Kasambagan Councilor George Chang nga dili nako huwaton nga adunay mopahibawo sa akong schedule, miadto ko sa UC Banilad vaccination center. Didto akong nasayran nga wala gihapon ako ma-register online. Ila na na lang akong gi-rehistro sa site.
Akong buot pasalamatan una sa tanan si Atty. Agusto Go nga mipagamit sa iyang tunghaan isip usa sa vaccination sites. Gidayeg usab nako ang mga sakop sa Department of Health 7, Cebu City Health Department, barangay health workers ug ang tanang mga doctor ug nurses, apil na ang mga volunteer sa maayong sistema. (msr1144@yahoo.com)