Usa ka bana nagpatambag sa marriage counselor. Bana: “Naproblema gyud ko sa akong asawa. Bisan lawom nang gabii, mosuroy gihapon sa mga bar.” Marriage counselor: “Palahubog diay ang imong asawa?” Bana: “Di man.” Marriage counselor: “Unya nganong moadto man siya sa mga bar?” Bana: “Mangita siya nako.”
Tingali nahitabo ni sa wa pa moluwat si Cebu City Mayor Edgardo Labella sa Executive Order (EO) 117 niadtong Pebrero 3, 2021 nga nagpatuman pagbalik sa total liquor ban sa syudad sa Sugbo aron malikayan ang mga non-essential gatherings sa mga pangpublikong lugar ug kamenusan ang pagkatap sa Covid-19.
Giluwatan ang maong EO tungod sa pagsaka pagbalik sa mga kaso sa Covid-19 sa syudad. Way inom sa mga ilimnong makahubog sa mga pangpublikong lugar. Sirado ang mga bar. Mahimong makainom sa mga hotels, resorts ug susamang mga establisemento apan alang lang sa mga in-house guests.
Apan nikunhod ang mga kaso sa Covid-19 sa syudad sugod sa hinapos sa buwan sa Marso hangtod sa Abril. Sa Pebrero 23, niabot sa kapin sa 2,500 ang mga aktibong kaso sa maong sakit sa syudad. Apan sa Mayo 3, 2021, nius-us kini ngadto sa 819 ug siyam na lang ang mga bag-ong kaso.
Mao nga gikatakdang moluwat si Mayor Labella og laing EO nga maglibkas sa liquor ban sa syudad sugod karong adlawa, Mayo 7, 2021. Subay kini, matod niya, sa rekomendasyon sa Emergency Operation Center (EOC), ang nag-monitor sa mga kaso sa Covid-19 sa syudad, ug sa hangyo sa Cebu Chamber of Commerce and Industry.
Tan-awa na, ang mga negosyante maoy nihangyo nga ilibkas ang liquor ban, di ang mga palainom. Ngano man? Sila man maoy labing apektado niini. Ang mga palainom makapalit man ug makainom og mga ilimnong makahubog, pero adto ra sa ilang balay.
Nikunhod ang mga kaso sa Covid-19 bisan kon nagpadayon ang pag-inom sa mga ilimnong makahubog didto sa balay sa mga palainom. Nagpakita kini nga ang pag-inom sa ilimnong makahubog way labot sa pagkatap sa Covid-19.
Ang angay tingaling likayan mao ang wa kinahanglana nga pagpundok-pundok sa mga tawo. Busa, mahimong magpadayon ang pag-inom sa mga bar basta limitado ang gidaghanon sa mga tawo ug seguruhon gyud ang physical distancing.
Sobra na ta sa usa ka tuig nga nag-antos sa epekto sa Covid-19. Ang mga lagda sa kagamhanan wa pay klaro. Sa ubang mga nasod sama sa Israel gilugakan na ang mga lagda kay nabakunahan na ang kadaghanan. Kita kanus-a pa man?