Maorag gidugmok ang akong kasingkasing nga nagtan-aw sa ‘Ka Puso Mo, Jessica Soho’ sa GMA 7 niadtong Dominggo sa gabii diin gi-feature ang usa ka makatandog sa balatian nga estorya sa kinabuhi sa usa ka 75 anyos nga tiguwang babaye nga taga sitio Calibasan, Brgy. Capt. Claudio, Toledo City, Cebu.
Molakaw pa intawon siya og pipila ka kilometro nga tungason ug dulhugon nga agianan aron makasag-ob og tubig ma-inum sa gamay nga busay.
Si Nanay Matilde nagpabiling dalaga. Wala nay kabanay nga nag-atiman. Ang iyang kauban sa payag mao lang ang duha ka binuhi niyang mga iro nga sila si ‘Kabang ug Diana’. Nagbuhi usab siya og pipila ka baboy nga maoy iyang gamay’ng panginabuhi. Nabuhi lang intawon si Nanay Tilde sa hinabang sa iyang mga silingan nga adunay malumong kasing-kasing.
Halos kada-adlaw molakaw si Nanay Tilde og usa ka oras ug mosubay sa delikadong tungason ug dulhugon nga dalan aron pagkawos og tubig. Gamay’ng sipyat, madakin-as ba ug makuyapan, adto siya punita sa ubos sa bung-aw. Sigurado nga patay siya.
Duha ka sungkod ang iyang gamiton isip abag. Magdala pa siya og bukag nga gihimong ‘back pack’ aron sudlan sa duha ka gagmay’ng plastic nga gallon. Kon masudlan na og tubig, ang mga gallon motimbang og mga 12 ka kilos. Tiaw nimo na, pagkabug-at, saka-kanaog pa sa bukid.
Makapahuway lang si Nanay Tilde kon mag-uwan kay makasawod siya og tubig gikan sa atop sa iyang balay ug i-stock sa iyang karaang banga. Kon way uwan sama karon kay summer, magsag-ob si Nanay Tilde. Ang iyang mga silingan sama sab og problema niya. Dugay na kini ug matag eleksiyon saaran sila sa mga pulitiko sa Toledo City nga butangan og tinubdan sa tubig. Apan kini nagpabiling saad hangtod karon.
Basin karon sunod nga eleksiyon, usbon na usab ang saad. Sa dihang gi-inspeksiyon sa engineers sa Toledo City government ang lugar, nagkinahanglan kini og P10 milyones nga budget alang sa water system. Mabuhi ang tawo kon dili makakaon og pipila ka adlaw, apan mamatay kon dili maka-inom sulod sa pipila ka adlaw kay ang tubig, kinabuhi. (bobbygnalzaro@gmail.com)