Kahibulongan ba kon dunay nakalusot nga illegal drugs sa Cebu City Jail? Makalibog ba kon dunay mga armas nga makalusot sa bilanggoan? Dinhi sa Pilipinas, labina sa Cebu, di na kini ikahibulong.
Di ba duna na may hitabo dinhi sa Sugbo katuigan na ang nakalabay nga ang killer binilanggo sa kanhi Bagong Buhay Rehabilitation Center (BBRC), karon City Jail na? Human makapatay, didto dagan ang gunman sulod sa kanhi BBRC.
Daghan na ang mga greyhound operation sa wa pa ang coronavirus pandemic nga dunay masakmit nga illegal drugs sa mga bilanggoan dinhi sa nasod. Mas grabe sa New Bilibid Prisons sa Muntinlupa kay toa ang dagkong drug transactions.
Kagahapon sa buntag sa Huwebes, kapin sa P1 million ang illegal drugs nga nasakmit sa greyhound operation sa city jail. Di na gihapon kini bag-o. Magtuo gihapon ang publiko nga kini scripted.
Lisod kombinsihon ang publiko nga way kakunsabo nga mga jail officer sa Bureau of Jail Management and Penology (BJMP) kon “the price is right.”
Makombinser lang ang publiko kon dunay mga ulo nga moligid, di lang kay puro lang praise release sa giingong mga imbestigasyon nga way gisangkoan.
Bati na man gud ang pagtan-aw sa publiko sa mga buhatan sa kagamhanan bisan sa labing gamay nga buhatan. Busa, di kalikayan nga ang kinabag-an sa publiko magduda nga dunay hukos pukos sa sulod. Kadto lang ginagmay ang himuon nga pampogi points, apan ang dagko nga dagko sab og hatag, gitapin-an.
Wan a kinahanglan nga ipakita pa sa publiko ang mga greyhound operation nga kasagaran tambungan pa sa media. Ang gustong makita sa katawhan mao ang pagsilot sa mga kurakot pinaagi sa pagtaral sa hukmanan ug pagbilanggo niadtong namatud-ang sad-an. Makasubo kay wa kini mahitabo.
Hangtod nga dunay mga ulo nga moligid sa diniyos nga imbestigasyon, di motuo ang publiko.