SUPERBALITA CEBU

Rota sa BRT butangan og bike lane

■ BIKE LANE: Si Department of Transportation (DOTr) Secretary Arthur Tugade (nag-microphone) miinspeksyon sa dedicated bike lane nga gibutang sa Department of Public Works and Highways (DPWH) kilid sa Cebu South Coastal Road sa Huwebes sa buntag, Mayo 6, 2021. / AMPER CAMPAÑA

Inay naa lang sa 100 kilometros ang gitas-on sa loop ang bike lanes sa Dakbayan sa Sugbo, madugangan kini og 38 kilometros kay butangan ang rota sa Bus Rapid Transit (BRT) route.

Mao kini ang gibutyag ni manlalaban Gerry Carillo, chairman sa Sugbo Bike Lanes Board, sa interbyu sa Superbalita Cebu human nibisita si Department of Transportation (DOTr) Secretary Arthur Tugade sa tres kilometros nga dedicated bike lane sa Cebu South Coastal Road (CSCR) sa Huwebes sa buntag, Mayo 6,2021.

Matod ni Carillo, nalipay si Tugade sa iyang nakitang kalamboan sa bike lane nga gusto niyang kopyahon kini sa ubang mga dapit sa Sugbo kay maoy gusto ni Presidente Rodrigo Duterte.

Si Carillo niingon nga dugangan ang gitas-on sa bike lanes nga ibutang sa rota nga subayon sa BRT gikan sa CSCR paingon sa Barangay Talamban aron anha mosubay ang mga magbiseklita paingon sa bus stations.

Sa iyang kalipay, niingon si Carillo nga nisulti si Tugade kang Department of Public Works and Highways (DPWH) Director Edgar Tabacon nga kon duna pay masobra sa P150 milyunes nga budget alang sa bike lanes sa Central Visayas, ihatag kini sa Siyudad sa Sugbo.

Samtang si Land Transportation Franchising and Regulatory Board (LTFRB) Chairman Martin Delgra III nimando kang Regional Director Eduardo Montealto nga makig-coordinate sa regional director sa Land Transportation Office (LTO) aron ang tanang mga polisiya niini sa karsada matakdo sa bikes lanes project sa Metro Cebu.

Gusto ni Tugade nga ipatuman ang balaud sa bike lanes alang sa mas luwas nga pagbiseklita.

Gusto usab niya ang dedicated bike lane kay sa shared nga agianan sa biseklita kay mas luwas kini alang sa mga siklista.

HAPIT MAHUMAN

Matod ni Carillo nga si Tabacon niingon nga ang bike lane sa CSCR hapit na mahuman, labing dugay sayo sa Hunyo.

Gusto si Tugade nga kon mahuman na, motambong siya sa pagbukas niini ngadto sa publiko.

Si Tabacon, sa iyang bahin, nisulti sa mga tigbalita nga naa na sa 90 porsyento ang dedicated bike lane.

Si Mark Steven Pastor, DOTr assistant secretary for Road Transport and Infrastructure, niingon nga ang nag-unang tumong sa proyekto mao ang pagseguro nga ang bike lanes luwas, way babag ug epektibo di lang sa paglingawlingaw, apan alang sab sa mga tawo nga mogamot sa biseklita isip transportasyon.

“There’s a lot of work to be done pa. In fact, we will do the bike racks para sa ating mga bikers. Aayusin natin para maging patag,” siya niingon.

Nidugang si Carillo nga magbutang ang South Road Properties management og solar lights sa kilid sa bike lane aron hayag gihapon kini bisan sa gabii.

Duna usay ipamutang nga bike racks aron butangan sa biseklita kon mopahuway ang nagbiseklita.

Samtang, gidayeg usab ni Tugade ang giumol nga Bike Patrol sa Siyudad kay gikinahanglan nga dunay mopatuman sa balaud.

Apan si Carillo niingon nga di pa makasugod ang mga sakop sa Bike Patrol sa ilang tahas kay duna pa silay laing training nga tambungan, hinuon ning buwana sila magsugod sa pagpatrolya human sa pagbansay. (REV, dugang taho ni WBS)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph