Driver nagmaoy, gipatay sa silingan

JEEPNEY driver nagmaoy, giluba-patay sa iyang silingan alas 12:44 sa udto sa Miyerkules, Mayo 5, 2021sa Brgy. Caduawan, Lungsod sa Tabogon, amihanang Sugbo.

Si Ednie Jumao-as Ornopia, 42, minyo, taga Brgy. Caduawan, gideklarar nga dead on arrival sa tambalanan sa Dakbayan sa Bogo.

Samtang nitahan sa kapulisan si Vincent Pabiran, 34, minyo, way trabaho, silingan ni Ornopia.

Si Police Master Sgt. Ben Anthony Alburo sa Tabogon Police Station nga nahinabi sa Superbalita Cebu, nagkanayon nga si Ornopia hubog nga naabot sa ilang lugar samtang si Pabiran diha sa daplin sa karsada uban sa ilang silingan nga naghimog kubo-kubo.

Nagmaoy si Ornopia, nanghagis hinungdan nga nagkalalis sila ni Pabiran.

Si Pabiran giingong gilabay og botelya sa ilimnong makahubog, naigo sa ulo ug liog.

Sa kalagot ni Pabiran, siya nipauli sa ilang balay nga pipila lang ka metros sa nahitaboan, nibalik dayon nagdala og duha ka kutsilyo. Giluba niya si Ornopia sa makadaghan pinaagi sa pagpuli-puli sa duha ka mga kutsilyo.

“Pag bulan sa Abril, na-blotter nasab ni sila nagkaaway, sa gihapon nagmaoy ang biktima,” dugang ni Alburo.

Si Pabiran nibutyag nga wala sila nagkaaway ni Ornopia, mokalit lang kinig maoy kon mahubog.

Wala siya masayod sa rason ni Ornopia kon nganong siya hagisan kon mahubog. Si Pabiran naa na sa Tabogon Police Station gibilanggo. (GPL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph