Sa paglibkas sa liquor ban sa Dakbayan sa Sugbo, unang 39 ka mga establisemento ang gitugotan nga makabalik og silbi og ilimnong makahubog.
Kini kon maisyu na ang ilang special permit para pag-serve og ilimnon human sa pagluwat ni Mayor Edgardo Labella sa Executive Order No. 130 nga naglibkas sa ban.
Gipanglantawan nga modaghan pa ang moabli nga establismento sa higayon nga makakumpleto na sila sa mga rekisito.
Si Atty. Jared Limquiaco, pangulo sa Business Permit and Licensing Office (BPLO,) nagkanayon nga ang establishment kinahanglan mopadala sa ilang representante para mopaubos sa Health Infection and Prevention Control Officer (HIPCO) para sa training nga pagadumalaon sa Emergency Operations Center (EOC).
Human sa pagbansay, ang EOC pinangulohan ni deputy chief implementer Joel Garganera kauban ang BPLO mosusi sa mga establisemento para pagtan-aw sa ilang set-up ug kapasisdad aron masiguro nga masunod gihapon ang minimum health protocol batok Covid-19.
Matod pa ni Limquiaco nga kon mahuman na ang requirements ug makuha na nila ang special permit to sell liquors, mahimo na sila makatinda sugod Biyernes, Mayo 7, 2021.
Ang liquor ban subling gipatuman ni Labella sa Cebu City gumikan sa pagsugod og saka sa kaso sa Covid-19 niadtong Pebrero 3, 2021 ug gilibkas kagahapon, Mayo 6, 2021
Si Garganera, sa iyang bahin, nagkanayon nga ang mga convenience store makabaligya og liquor apan gidid-an sila nga makapainom sa ilang mga kustomer diha sa ilang premises o hawanan.
“They can sell since we allow that, but they (customers) are not allowed to drink in public view. We are not allowing that,” padayag ni Garganera.
Ang mga masakpan nga mag-inom sa mga pampublikong lugar ug diha sa mga sarisari store pagadakpon sa mga pulis.
Taliwa sa pag-abli sa mga restaurant ug bars, mosunod gihapon sila sa curfew hours diin alas 11:oo sa gabii kinahanglan nga hawan na ang mga establisemento. (PAC)