2.3-km. bike lane sa SRP gisusi ni DOTr Sec. Tugade

Gipangulohan ni Transport Secretary Arthur Tugade ang pag inspeksiyon sa 2.3 kilometros nga bahin sa Metro Cebu Bike Lane ngadto sa South Road Properties (SRP) sa Huwebes, Mayo 6, 2021.

Ang maong bike lane nga adunay kinatibuk-ang gitas-on nga 140 kilometros gikan sa Talisay City, Cebu City, Mandaue City, ug Lapu Lapu City, giingon nga mamahimo nang magamit sa publiko karong Hunyo 2021.

Nagkanayon si Edgar Tabacon, direktor sa Department of Public Works and Highways (DPWH) 7 kinsa gitahasan sa pagtukod sa maong proyekto, nga mokabat na sa 90 porsiyento ang accomplishment rate sa maong proyekto base sa ilang datus sa unang semana sa Mayo.

Matud niya nagsugod ang hingpit nga konstruksiyon niining P150 million nga balor sa Metro Cebu Bike Lane sukad niadtong Pebrero ning tuiga.

Ang eksklusibo nga bike lane anaa nahimutang sa tuo nga bahin sa Cebu South Coastal Road ug aduna kini gilapdon nga five meters ug aduna usab kini pedestrian sidewalk nga 3 meters.

Gawas niini, aduna usab kini plant box nga 1.5 meters ug kasilungan kun shades alang sa bike rack.

Aduna usab kini solar lighting nga maoy magamit kon mugabii na.

Sigun ni Mark Steven Pastor, Department of Transportation (DOTr) assistant secretary for Road Transport and Infrastructure, nga gihatagan og importansya ang kaluwas sa bike lanes.

“There’s a lot of work to be done pa. In fact, we will do the bike racks para sa ating mga bikers. Aayusin natin para maging patag,” matud niya.

Mihatag usab ang DOTr og biker’s manual diin gibutang dinhi ang guidelines sa paggamit sa bike lanes.

Lakip niini ang guidelines nga ang bisekleta ra ug light mobility vehicles o personal mobility devices nga nagtimbang og dili molapas sa 100 kilograms ang makagamit niini.

Anaa ra usab sa 25 kilometros matag oras dapat ang gipaspason kun magdrayb sa bike lane.

Human sa gipahigayon nga inspeksiyon, gipahigayon usab kagahapon sa buntag ang ceremonial biking nga gisalmotan usab sa Sugbo Bikelanes Boards (bike patrols) kauban ang chairman niini nga si Gerry Carillo, Pastor, DOTr Asec. Giovanni Lopez, Land Transportation ug Franchising Regulatory Board (LTFRB) Chairman Martin Delgra, ug LTFRB 7 Director Eduardo Montealto. (WBS)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph