MIDUSO og balaudnon ang mga konsehal sa siyudad sa Davao aron nga himuong legal ang operasyon sa habal-habal sa dakbayan.
Gikanayon ni Konsehal Danilo Dayanghirang atol sa regular sesyon niadtong Martes, Mayo 4, kon diin gisugyot ang ordinansa nga giduso ngadto kang Mayor Sara Duterte-Carpio sa tumong nga makatabang sa mga drayber sa habal-habal sa siyudad ilabi na panahon ning Covid-19 nga pandemya.
Matud ni Dayanghirang nga mga drayber misumbong sa ilang kahimtang kon unsa ka lisud mokuha og mga pasahero, hinungdan nga moresulta sa di pagkasinabot.
Gisulti sa konsehal nga ang maong ordinansa mohatag og kaluwasan ug health measures alang sa drayber ug sa sumasakay.
Subay sa ordinansa, ang habal-habal nagtumbok niadtong motorsiklo, nga gigamit nga depasahero gikan sa usa ka lugar ngadto sa lain ug dunay bayad.
Base sa gisugyot nga ordinansa, walay tawo nga maka-operate ug makamaneho og habal-habal sud sa siyudad gawas lang kung motuman sa: kasamtangang Land Transportation Office registration ug official receipt sa habal-habal unit; kasamtangang driver's license sa drayber; ug bayad sa tinuig nga license fee ngadto sa City Treasurer's Office nga P500, eksklusibo sa lain pang regulatory fees ug charges.
Laing rekisito mao nga ang drayber dunay insurance alang sa drayber ug pasahero. Kini maglakip sa compulsory third party liability (CTPL) insurance, common carrier insurance sa pasahero, ug uban pang insurance nga pangayuon sa nagpatuman nga ahensiya.
Ang drayber ug pasahero kinahanglan naay helmet, subay sa Section 3 sa Republic Act 10054 o An Act mandating all motorcycle riders to wear standard protective motorcycle helmets."
Ang gisugyot nga ordinansa duna say rekisito nga "color coded helmet" depende sa ruta nga ideterminar sa City Transport and Traffic Management Office.
Dugang pa niini, di tugtan ang mga tawo nga ubos sa nuybe anyos nga moangkas sa habal-habal. Alang sa nuybe hangtud kinse anyos nga pasahero, kinahanglan nga ubanan sila sa ilang ginikanan o guardian.
Di sab tugtan ang mga habal-habal nga mobiyahe sa mga lugar nga duna nay mga sakyanang depasahero.
Tagaan sila og mga lugar nga biyahian nga ideterminar sa buhatan sa mayor sa pakig-alayon sa gi-deputized nga traffic police. (Ralph Lawrence G. Llemit)