POSIBLENG mag-atubang og kalapasan ang mga motorista tungod sa paggamit ug pagbabag sa mga bike lanes.
Kini maoy nahimong pahimangno sa Davao City Transport and Traffic Management Office (CTTMO).
Gikanayon ni CTTMO chief Dionisio Abude nga ang lokal nga kagamhanan, pinaagi sa 19th City Council, kasamtangan nga nagha-ay og pipila ka mga probisyon sa Bicycle Ordinance and the Traffic Code of Davao.
"Gina-finalize na nato ang penalties sa parking or obstruction sa bike lanes. Since naa na man ta’y bike lanes, so, mag-implement na pud ta nga dapat walay mo-parking diha," batbat ni Abude.
Sa pagkakaron, gisulti ni Abude nga mga drayber sa sakyanan kinsa ilegal nga nagparada sa bike lanes mag-atubang og kasong ilegal nga parking ug multa nga P500. Dugang pa niini, mahimo sab silang mag-atubang og kaso sa paglapas ug pagbalewala sa traffic signs.
Giklaro ni Abude nga ang gitugot lang nga oras sa paghunong ug pagpakanaug sa gidesignar nga bike lanes moabot lang og kuwatro minutos.
Sobra niini, kon madakpan, ang molapas isyuhan og citation ticket.
Matud niya nga ang CTTMO naghatag og prayoridad sa establisemento sa Bike Management Team nga magmonitor sa saktong paggamit sa bike lanes sa dakbayan.
Sa kasamtangan, ang dakbayan dunay 27 dalan nga dunay bag-o ug gipalambo nga bike lanes.
Nagtrabaho na ang CCTMO sa pag-edukar sa mga tawo alang sa kaluwasan ug saktong paggamit sa bike lanes.
Gihangyo ni Abude ang mga motorista ug siklista nga mosunod sa traffic rules ug regulasyon. (Uban sa taho sa CIO)