Ang Pilipinas ug China padayong nag-ilog sa West Philippine Sea o South China Sea (Ayungin Shoal). Naa ang bahandianong Benham Rise, Mischief Reef, Red/Recto Bank, Sanday Cay, Sibuto Straight, Fierry Reef, Subi Reef, Pag-asa, Hunan, Masinloc ug Julian Felipe Reef.
Mipakanaog nag hukom ang UN Arbitral Tribunal nga iya sa Pilipinas ang maong wanang basi sa kalibotanong balaod sa kadagatan. Apan si Chinese Pres. Xi Jinping wala motahod sa desisyon mihagit og pakiggubat apan giamigo ni Pres. Rodrigo Duterte bugti sa economic aide ug investment.
Diplomasya ang kasulbaran dili giyera. Misang-at nag diplomatic protests ang Pilipinas batok China sa wala pagtahod sa hukom, abyon sa AFP gipabuthan sa barkong Tsino, warships sa China milibot sa Sibuto Straight, nagmontar og research stations sa Fierry ug Subi Reefs, radar gun gipunting sa Philipine Navy ships sa Hunan, gisakmit ang panagat sa Bajo de Masinloc ug pagpalawig sa 240 ka Chinese vessels sa Julian Felipe Reef.
Kadtong pagbangga sa Yuemaobinya Chinese fishing vessel sa F/B Gemver Philippine fishing vessel sa Hunyo 2019 ug Chinese cargo vessel sa Philippine fishing vessel sa Hulyo 2020 ingon man ang paghimog military exercises sa China sa giilogan nga teritoryo nakahaling sa kasungian. US nga nagpaluyo sa Pilipinas mipalawig og 100 ka warships. Pilipinas mitukod og beach ramp sa Pag-asa nga dakong isla sa West Phil. Sea. Agig pangandam mipalit og cruise missiles sa India, missile boats ug ground base air defense system sa Israel.
UN nagkondenar sa China sa wala pagtahod sa hukom. Kanhi Senior Associate Justice Antonio Carpio mipadayag nga ang hagit sa pakiggubat maoy lig-ong sukaranan sa Pilipinas nga mopasaka og kaso sa International Court of Justice pagdemanda nga tumanon sa China ang hukom. Kon dili molihok ang Pilipinas sama ra milingiw sa kabtangan nga giangkon sa China nga nakalapas sa UN Charter.