Kung may taga Barangay Cawayan ug Barangay Malunis sa lungsod sa Dalaguete nga nagbasa karon, palihog patalinghugi kining mosunod nga sugilanon sa usa ka 83 anyos nga akong nahimamat gahapon.
Didto ko sa usa ka convenient store sa Barangay Cogon Pardo, Cebu City. Human nako mapalit ang akong tuyo, nilingkod ko sa lingkuranan sa gawas. Nagbitbit ko sa akong cellphone kay nagpaabot sa tawag sa akong cameraman para sa usa ka documentary nga among i-shoot. Sukad ko ni-retire sa telebisyon mao ni ang akong gikalingawan, mao nga hapit matag adlaw ko nga nag warawara sa bisan asang suok.
Kalit nga naagi ang usa ka babaye nga may pangidaron na nga nagbitbit og plastik bag nga may sulod nga siniping saging nga lakatan. Iyaha kong giduol.
“Palite ko og saging, sir,” iyang suna nako. Iyang gipahiluna sa lamisa ang tulo ka sipi ug nihisgut siya sa presyo. Nilingkod sab siya sa laing lingkoranan sa akong atbang og dinhi nagsugod ang among kukabildo.
Nagpaila ko niya ug iyaha kong gitug-anan sa iyang pangalan. Siya si Dorotea Casano Amad, 83, ug molupyo sa sitio Lomboy, Barangay Inayawan, Cebu City. Doring ang iyang angga.
Matod ni Lola Doring, dugay na siya nga nabiyuda ug ang pagpangangkat ug pagpanuroy og saging maoy iyang gikabuhian karon. Hinuon bisan sa iyang pangidaron nakita nako nga askig pa ang iyang panglawas alang sa maong pangita.
Sigun sa iyang asoy, natawo siya niadtong 1938 sa Mabolo, Cebu City. Duha pa lang ka bulan sukad sa iyang pagka himugso nailo na siya sa amahan. Gitulis ug napatay ang Papa Felimon lumad nga taga Malunis, Dalaguete, nagsakay og parada duol sa Patria de Cebu. Kini nahitabo nianang gabii human sa iyang bunyag nianang udto. Gikan ang amahan nga nagdula og bowling sa Patria sa wala pa tulisa. Iyang nasayran gikan sa iyang Mama Maxima nga
may dala nga 500 pesos nga niadtong panahona hilabihan nang dakoa. Mao siguroy hinungdan nganong gitulis siya. Maayo man sab og trabaho ang iyang Papa sa koprasan sa Ludo.
Sa nakat-on na siya og buot didto na siya nagpuyo sa iyang apohan sa Cawayan, Dalaguete. Ug nagtungha siya sa elementarya sa Casay. Nabuwag siya sa iyang duha ka magulang nga sila si Leonardo ug Feliciano. Natapos niya ang elementarya ug sa pangedaron nga 14 anyos nabalik siya sa iyang inahan sa Cebu City ug diha na sila sa dalan C. Padilla nagpuyo.
Wala lang sab damha nagkabuwag sila sa iyang bana ug nisulod siya pagka labandera sa pangedaron nga 28 anyos. Gikan sa pagka labandera nahimo siya nga yaya sa upat ka anak sa negosyante.
Nibiya siya sa pagka yaya sa dihang nangaminyo na ang upat ka bata nga iyang gibantayan.
Ug sa iyang katigulangon ug kakabus dili babag sa pagbuhat sa mga butang aron nga kita mabuhi ning kalibutana. Happy Mother’s Day, Lola Doring.