Binghay: Life is short

KAMI tanang mga suod nga higala ni anhing Nelia nakurat ug wa dayon ka tuo pagbalita sa iyang kalit nga pagpanaw sa edad nga 54.

Sa iyang haya, nagpuli-puli mi og hisgot sa iyang mga maayong hiyas ug binuhatang di malimtan. Iya mismong bana ug mga anak wa sab dayon nakadawat sa iyang kamatayon kay hangtod karon nagsegi gihapon og handuraw sa iyang kaayo, mga tam-is ug di malimtang maanindot nga kagahapon lakip sa mga pangandoy ug damgo nga wa matuman.

Atol sa haya, daghang mga pagtulun-an ang akong napupo labi na mga maayong pulong ug buhat nga kristohanon.

Usa sa mga daghang napatik sa akong alimpatakan mao ang pulong ‘life is short’ kay di man nato matag-an kung anus-a mo expire ang atong hinuwaman nga kinabuhi dinhi sa yuta. Mao sab kini rason nganong maninguha ko nga magmalipayon kada adlaw bisan pa man sa nagsapaw-sapaw nga tulumanon.

Ang kalipay naa sa atong huna-huna ug kasing-kasing. Ang sapi ug bahandi di makatupong ining tanan.

Tungod kay paspas man kaayo modagan ang oras ug panahon, diay akong ipa-ambit nga mga sekrito kung unsaon pagpuyo nga simple, kontento ug malipayon.

Ayaw basula ang kaugalingon sa imong sitwasyon o kahimtang kay kini tanan apil sa dakong plano para nato gikan sa kahitas-an. Larga ug suruya ang mga lugar nga gusto nimong makita, dinhi o sa gawas, samtang maayo pa ang lawas ug makalakaw pa.

Kung dunay imbitasyon o reunion, kuyog og apil.

Ayaw palabi og tigom sa imong kwarta, pahati ang imong kalipay, palita imong gusto og paboritong pagkaon, basta di lang permanentihon og pasubrahan, samtang makakaon pa. Hinumdumi ang imong bahandi ug sapi di kini nimo madala sa imong lubnganan.

Kanang imong matag buwan nga madawat nga pension, ayaw segiha og tapig. Gastuha hinuon kini sa mga butang nga makapalipay nimo. Hinumdumi nga imo kining hinaguan kay tingali baya og mao ra kini ilogan o awayan sa imong mga kabanay. Hatagi og importansiya imong pamilya ug labaw sa tanan katawa ug kalipay, remember, life is short.