Giaprubahan na sa Inter-Agency Task Force (IATF) ang hangyo sa Philippine Basketball Association (PBA) nga makapahigayon na og praktis ang ilang teams sa mga lugar nga ubos sa general community quarantine (GCQ) ug MGCQ.
Kining maong kalambuan naghatag og kahayag sa tinguha sa PBA nga masugdan ang ilang 45th season sa ulahing bahin ning buwana o sa sayong bahin sa sunod buwan.
Mismong si Presidential Spokesperson Harry Roque ang nianunsyo nga mahimo nga makapahigayon og praktis ang PBA teams apan kinahanglang ipaagi kini sa bubble set-up.
Hinuon, mahimo lang makapraktis ang PBA teams sa gawas sa NCR+ bubble nga gipaubos sa modified enhanced community quarantine (MECQ) hangtod karong Mayo 14, 2021.
Labing seguro, adunay PBA teams nga magpraktis na’g sugod sa Batangas City, nga anaa sa ubos sa general community quarantine (GCQ).
Daan nang nipadayag ang Batangas City sa ilang kaandam pagdawat sa PBA teams nga gustong mag-ensayo sa ilang lugar.
Ang ubang mga lugar nga giplanuhan sa PBA nga pahigayunan og praktis mao ang Clark, Pampanga, Subic, Zambales, ug Ilocos Norte. (ESL)