Mga duwa karon
4:30 pm- KIA batok Talk N’ Text
7:00 pm- Alaska batok Phoenix
“Gubot pa sa lukot” maoy kasamtangang sitwasyon sa Rain or Shine Elasto Painters.
Ubay-ubay nga tinubdan sa Spin.ph ang miingon nga dili lang usa, kon dili tulo ka sinaligang mga magduduwa sa Elasto Painters ang nagtinguha nga mabalhin og laing team.
Matod pa nga sila si Raymond Almazan, Beau Belga ug Jericho Cruz ang wala nakauyon kon giunsa pagdala ni coach Caloy Garcia ang Elasto Painters.
Sa tulo, ang sitwasyon ni Almazan ang labing dayag human sa ilang panag-away ni Garcia nga nakita sa publiko diin gibangko sa sophomore coach ang iyang sentro sa duwa batok sa Globalport Batang Pier niadtong Enero 12.
Sa tinguha nga mahusay ang bikil, kinasingkasing nga nagsultianay sila si Almazan ug Garcia sa atubangan ni team governor Atty. Mert Mondragon sa miaging semana.
Apan nagpabiling dili maayo ang sitwasyon hangtod karon. Niadtong Lunes, si Almazan wala motunga sa praktis sa Elasto Painters sa wala’y klarong hinungdan.
Si Cruz naa sab sa dapig ni Almazan. Ang high-scoring guard gikan sa Adamson wala na makapakita og maayo sukad sa pagbiya ni coach Yeng Guiao, kinsa mao na’y nagdala sa NLEX Road Warriors.
Ubos sa paggiya ni Guiao kaniadto, si Cruz nag-average og 12.5 puntos, 3.2 rebounds ug 2.0 assists apan mikunhod kini sa 9.6 puntos sa miaging season.
Sa kasamtangang nagpadayon nga Philippine Cup, si Cruz sulod pa lang sa duha ka mga duwa nakapakita og aksyon gumikan kay gihasol kini sa iyang pagkaangol.
“Pursigido si Jericho na sumibat,” matod pa sa tinubdan ngadto sa Spin.ph. “Malaking kawalan yun kasi bata at scorer talaga ng team ‘yun.”
Sa iyang bahin, si Belga milab-as pagbalik sa iyang intensyon nga i-trade siya sa laing team.
Sa miaging tulo ka mga tuig, diriyot mabalhin si Belga sa San Miguel Beermen apan nahangyo siya ni Guiao nga magpabilin.
“Si Beau, lagi namang naghahanap ng trade yan eh. Kasi pakiramdam nya nagawa na nya lahat para sa Rain or Shine, gusto naman nya ng bagong challenge,” pasabot sa tinubdan.
Ang laing dekalidad nga magduduwa sa Elasto Painter nga si James Yap gilaumang mosunod sab sa lakang nila ni Belga, Almazan ug Cruz.
Nagpakahilom ra man tuod si Yap apan ang iyang mga sumosunod nangreklamo na kon nganong ubos ra ang playing time sa ilang idolo.
Sa laing bahin, magparang ang Alaska Aces ug Phoenix Fuel Masters sa main game karong gabii sa pagpadayon sa Philippine Cup sa Mall of Asia Arena.
Panagsangka kini sa teams nga adunay susama og sestima. Ang Aces gigiyahan ni coach Alex Compton samtang ang Fuel Masters gigunitan ni coach Louie Alas, kanhi assistant ni Compton.
“Tough game for us as coach Louie (Alas) and coach Topex (Robinson) have been with me for three years and they know my values and what we teach,” matod ni Compton sa interbyu sa PBA.ph.
“I think it will be an exhausting battle for both teams and a really exciting game for the PBA fans.”
Ang Aces adunay 4-2 nga rekord samtang ang Fuel Masters naghupot og 3-3 nga baraha.
Sa premirong duwa, magsangka ang Talk N’ Text KaTropa ug KIA Picanto. (ESL)